|
|
by Suryaa Desk | Thu, Jun 26, 2025, 01:13 PM
భారత రాష్ట్ర సమితి (బీఆర్ఎస్) ఎమ్మెల్సీ కల్వకుంట్ల కవిత, తెలంగాణ ముఖ్యమంత్రి ఎ. రేవంత్ రెడ్డిపై తీవ్ర విమర్శలు గుప్పించారు. కాంగ్రెస్ ప్రభుత్వం 18 నెలల పాలనలో రూ.2 లక్షల కోట్ల అప్పు చేసిందని, ఈ ఘనత సీఎం రేవంత్ రెడ్డికే దక్కుతుందని ఆమె ఆరోపించారు. ఈ అప్పు ఎక్కడ, ఎలా ఖర్చు చేశారో వివరిస్తూ శ్వేతపత్రం విడుదల చేయాలని కవిత డిమాండ్ చేశారు. విద్యా, వైద్య రంగాలను నిర్లక్ష్యం చేసి, కాంట్రాక్టర్లకు కమీషన్లు ఇస్తూ రేవంత్ రెడ్డి "అవినీతి చక్రవర్తి"గా మారారని ఆమె వ్యాఖ్యానించారు.
కవిత మాట్లాడుతూ, రేవంత్ రెడ్డి పాలనలో అవినీతి రాజ్యమేలుతోందని, రూ.1,200 కోట్లను కోడంగల్ లిఫ్ట్ ఇరిగేషన్ స్కీమ్ కింద రాఘవ కన్స్ట్రక్షన్స్, ఎంఈఐఎల్ సంస్థలకు ముందస్తు చెల్లింపులు చేసినట్లు ఆరోపించారు. ఈ ప్రాజెక్టులో ఎలాంటి భౌతిక పురోగతి కనిపించడం లేదని, అయినప్పటికీ ఈ చెల్లింపులు జరిగాయని ఆమె పేర్కొన్నారు. అలాగే, గోదావరి-బనకచెర్ల ప్రాజెక్టు విషయంలో రేవంత్ రెడ్డి, ఆంధ్రప్రదేశ్ సీఎం చంద్రబాబు నాయుడితో కుమ్మక్కై, తెలంగాణ జల హక్కులను రాజీ చేస్తున్నారని కవిత ఆరోపించారు.
ఇదిలా ఉండగా, భద్రాచలంలో రాముడి ఆలయం మునిగిపోతున్నా, బీజేపీ ఎంపీలు నిమ్మకు నీరెత్తినట్లు స్పందించడం లేదని కవిత విమర్శించారు. కాంగ్రెస్ ప్రభుత్వం తమ ఆరు గ్యారంటీలను అమలు చేయడంలో విఫలమైందని, ప్రజలను మోసం చేస్తోందని ఆమె ఆరోపించారు. తెలంగాణ జాగృతి ఆధ్వర్యంలో ఈ అవినీతి ఆరోపణలపై ఓ పుస్తకం త్వరలో ప్రచురించనున్నట్లు కవిత ప్రకటించారు.
