|
|
by Suryaa Desk | Sat, Aug 16, 2025, 07:47 PM
ఫ్యాన్సీ నంబర్లకు ఎంత క్రేజ్ ఉంటుందో ప్రత్యేకంగా చెప్పాల్సిన పని లేదు. కొందరు వాహనం ధర కన్నా.. అధికంగా ఫ్యాన్సీ నంబర్కు చెల్లించి కొనుగోలు చేసుకుంటారు. చాలా మంది తమకు కలిసి వచ్చిన నంబర్ అనో లేదా.. జాతకం ప్రకారం కలిసి వచ్చే నంబర్ తీసుకోవాలనో ఆశపడుతుంటారు. సామాన్యుల నుంచి సెలబ్రిటీల వరకు దాదాపుగా అందరికి ఈ ఫ్యాన్సీ నంబర్ల పిచ్చి ఉంటుంది. మరి మీరు కూడా ఇలా ఫ్యాన్సీ నంబర్ను ఇష్టపడేవారా.. అయితే మీకు తెలంగాణ రవాణా శాఖ బ్యాడ్ న్యూస్ తెలిసింది.
తాజాగా తెలంగాణ రవాణా శాఖ ఫ్యాన్సీ నంబర్ల ఫీజులను భారీగా పెంచింది. ఈ మేరకు రవాణా శాఖ ప్రాథమిక నోటిఫికేషన్ జారీ చేసింది. ప్రతి ఏటా ఫ్యాన్సీ నంబర్ల కేటాయింపు ద్వారా రవాణా శాఖకు సుమారు 100 కోట్ల రూపాయల వరకు ఆదాయం లభిస్తుంటుంది. ఇకపై అది మరింత పెరిగే అవకాశం ఉందంటున్నారు.
తెలంగాణ రవాణా శాఖ ఫ్యాన్సీ నంబర్ల ఫీజులు భారీగా పెంచింది. గతంలో ఫ్యాన్సీ నంబర్ల కేటాయింపుకు గతంలో 5 శ్లాబులుగా ఉండగా.. ఇప్పుడు అవి ఏడుకు పెరిగాయి. అంటే గతంలో ఫ్యాన్సీ నంబర్లకు రూ.50 వేలు ఉన్న ధర.. ఇప్పుడు ఏకంగా రూ.1.50 లక్షలకు పెరిగింది. అంటే రెండురెట్లు ఫీజు పెరిగిందన్నమాట. అలానే రూ.40 వేలు ఉన్న ఫీజు లక్ష రూపాయలకు, రూ.30 వేలు ఉన్న ఫీజు యాభై వేలకి పెంచుతూ రవాణా శాఖ నిర్ణయం తీసుకుంది.
ఇక రూ.20 వేల ఫీజును రూ.40000కి.. రూ.10 వేల ఫీజును రూ.30000కి.. రూ.5వేల ఫీజును రూ.6000కి పెంచారు. దాంతో ఫ్యాన్సీ నంబర్లపై ఆసక్తి ఉన్నవారికి ఆర్థిక భారం మరింత పెరగనుంది. 1, 9, 6666, 9999, 8055 వంటి సుమారు 100 వరకు ఫ్యాన్సీ నంబర్ల పెరిగే అవకాశం ఉందంటున్నారు. దానిపై అభ్యంతరాలు, సూచనలు, సలహాలు స్వీకరించిన తర్వాత.. త్వరలోనే పూర్తిస్థాయి నోటిఫికేషన్ జారీ చేస్తామని రవాణా శాఖ వెల్లడించింది.
ఫ్యాన్సీ నంబర్లలో 9999 నంబరుకు ప్రాథమిక ధర రూ. 50 వేలు ఉండేది. ఆ మొత్తం చెల్లించి ఆన్లైన్ వేలంలో ఎవరు ఎక్కువ మొత్తానికి పాడుకుంటే వారికే ఆ నంబరు కేటాయించేవారు. ఇకపై ఈ నంబరుకు ప్రాథమిక ధర లక్షన్నరగా సవరించారు. 6666 నంబరుకు ప్రస్తుతం రూ. 30 వేలు ప్రాథమిక ధర ఉండగా దాన్ని రూ. 70 వేలకు పెంచాలని నిర్ణయించారు.
