|
|
by Suryaa Desk | Sun, Aug 17, 2025, 08:45 PM
ఎగువ ప్రాంతాల్లో కురుస్తున్న భారీ వర్షాల కారణంగా నాగార్జున సాగర్ ప్రాజెక్టుకు వరద ప్రవాహం పోటెత్తుతోంది. ప్రాజెక్టులోకి భారీగా వస్తున్న వరదను నియంత్రించడానికి అధికారులు 22 గేట్లను ఎత్తి దిగువకు నీటిని విడుదల చేస్తున్నారు. ఈ దృశ్యం పర్యాటకులకు కనువిందు చేస్తోంది. సాగర్ పూర్తి స్థాయి నీటిమట్టం 590 అడుగులు కాగా.. ప్రస్తుతం 587 అడుగుల నీటిమట్టం నమోదైంది. అలాగే, ప్రాజెక్టు పూర్తి స్థాయి సామర్థ్యం 312 టీఎంసీలు కాగా.. ప్రస్తుతం 305 టీఎంసీల నీరు నిల్వ ఉంది. ప్రాజెక్టులోకి 1.98 లక్షల క్యూసెక్కుల ఇన్ఫ్లో కొనసాగుతుండగా.. 2.13 లక్షల క్యూసెక్కుల ఔట్ఫ్లో నమోదవుతోంది.
సాగర్ స్పిల్వే ద్వారా 1.71 లక్షల క్యూసెక్కుల నీటిని దిగువకు విడుదల చేస్తున్నారు. నాగార్జున సాగర్ గేట్లు ఎత్తివేయడంతో ఆ దృశ్యాన్ని చూసేందుకు పర్యాటకులు పెద్ద సంఖ్యలో వస్తున్నారు. జలకళతో నిండిన సాగర్ అందాలను, ఉరకలేస్తున్న వరద నీటిని చూసి ఆనందించడానికి ఇది సరైన సమయం. ఈ అద్భుతమైన దృశ్యం పర్యాటకులకు మరపురాని అనుభూతిని ఇస్తుంది. అధికారులు, పోలీసులు పర్యాటకుల భద్రతను పర్యవేక్షిస్తున్నారు. వర్షాలు కొనసాగుతున్నందున, సందర్శకులు జాగ్రత్తగా ఉండాలని, నిబంధనలు పాటించాలని అధికారులు సూచిస్తున్నారు.
తెలంగాణలో కురుస్తున్న భారీ వర్షాలు, వరదల నేపథ్యంలో పంచాయతీరాజ్ శాఖ ప్రజల సహాయార్థం కీలక చర్యలు చేపట్టింది. రాష్ట్ర స్థాయిలో ఒక ఫ్లడ్ కంట్రోల్ రూమ్ను ఏర్పాటు చేసింది. వర్షాల వల్ల రోడ్లు, ఇతర ఇంజినీరింగ్ మౌలిక సదుపాయాలకు సంబంధించిన సమస్యలు తలెత్తితే ఈ కంట్రోల్ రూమ్ను సంప్రదించవచ్చు. ప్రజల ఫిర్యాదులను స్వీకరించేందుకు పంచాయతీరాజ్ శాఖ 040-3517-4352 అనే టోల్-ఫ్రీ నంబర్ను అందుబాటులోకి తెచ్చింది. ఈ నంబర్ ఇంజినీర్ ఇన్ చీఫ్ కార్యాలయంలో ఏర్పాటు చేసిన కంట్రోల్ రూమ్కు అనుసంధానించబడి ఉంటుంది. వర్షాల కారణంగా ఎక్కడైనా రోడ్లు దెబ్బతిన్నా.. కల్వర్టులు కూలినా.. లేదా రోడ్లపై గండ్లు పడినా ప్రజలు ఈ నంబర్కు ఫోన్ చేసి సమాచారం అందించవచ్చు.
రాష్ట్ర స్థాయి కంట్రోల్ రూమ్తో పాటు, ప్రతి సర్కిల్ రేంజ్లో ఉన్న సూపరింటెండెంట్ ఇంజినీర్, ఎగ్జిక్యూటివ్ ఇంజినీర్ కార్యాలయాల్లో కూడా కంట్రోల్ రూమ్లను ఏర్పాటు చేసినట్లు అధికారులు తెలిపారు. ఈ చర్యల ద్వారా క్షేత్రస్థాయిలో సమస్యలను త్వరితగతిన పరిష్కరించవచ్చని అధికారులు పేర్కొన్నారు. ప్రజలు సమస్యలను వెంటనే ఫిర్యాదు చేయడం ద్వారా ప్రమాదాలను నివారించవచ్చని, ప్రజా రవాణాకు అంతరాయం కలగకుండా చూడవచ్చని అధికారులు వెల్లడించారు. ఈ కంట్రోల్ రూమ్లు 24 గంటలు పనిచేసి ప్రజలకు సహాయపడతాయి.
