|
|
by Suryaa Desk | Mon, Aug 11, 2025, 07:27 PM
తెలంగాణలో కొత్తగా రేషన్ కార్డులు పొందిన వారికి ఇది నిజంగా శుభవార్త. వచ్చే నెల.. అంటే సెప్టెంబర్ నుంచి వారికి బియ్యం పంపిణీ చేయనున్నారు. ప్రభుత్వం కొత్తగా మంజూరు చేసిన కార్డులతో పాటు.. పాత కార్డుల్లో కొత్తగా సభ్యులుగా చేరిన వారికి కూడా ఈసారి బియ్యం అందనుంది. గతంలో ప్రకృతి వైపరీత్యాల కారణంగా జూన్లో మూడు నెలల బియ్యం ఒకేసారి పంపిణీ చేసిన సంగతి తెలిసిందే. అందుకే జూలై, ఆగస్టు నెలల్లో పంపిణీ ఆగిపోయింది. ఇప్పుడు సెప్టెంబర్ 1 నుంచి తిరిగి పంపిణీ ప్రారంభం కానుంది. ఈసారి గతంలో కంటే చాలా ఎక్కువ కోటాను కేటాయించాల్సిన అవసరం ఉంది.
గతంలో పది సంవత్సరాల పాటు అధికారంలో ఉన్న బీఆర్ఎస్ ప్రభుత్వం కొత్త రేషన్ కార్డులు జారీ చేయలేదు. దీంతో చాలామంది ప్రజలు ఇబ్బందులు పడ్డారు. కొత్త పథకాలకు రేషన్ కార్డు తప్పనిసరి కావడంతో అనేక కుటుంబాలు ప్రభుత్వ సాయానికి దూరమయ్యాయి. కాంగ్రెస్ ప్రభుత్వం అధికారంలోకి వచ్చాక.. ఈ సమస్యపై దృష్టి పెట్టింది. ప్రజాపాలనలో భాగంగా మీ సేవ ద్వారా, అలాగే గ్రామ సభల ద్వారా లక్షలాది దరఖాస్తులను స్వీకరించింది.
ఉమ్మడి నల్గొండ జిల్లాల నుంచే మీ సేవ ద్వారా 1,18,681, ప్రజాపాలన ద్వారా 2,68,921 దరఖాస్తులు వచ్చాయి. వీటిని పరిశీలించిన రెవెన్యూ అధికారులు అర్హులైన వారిని ఎంపిక చేశారు. ఫిబ్రవరి 2025 నుంచి ఇప్పటివరకు విడతలవారీగా దాదాపు 96,060 కొత్త రేషన్ కార్డులు మంజూరు అయ్యాయి. దీంతో ఉమ్మడి జిల్లాల్లో రేషన్ కార్డుల సంఖ్య ఏకంగా 11,25,290కి చేరింది. ఈ కొత్త కార్డులలో మొత్తం 34,05,671 మంది సభ్యులు ఉన్నారు. వీరందరికీ కలిపి 20,434 టన్నుల బియ్యం పంపిణీ చేయనున్నారు.
ఈ బియ్యం పంపిణీకి అవసరమైన ఏర్పాట్లు చేస్తున్నారు. కేంద్ర ప్రభుత్వం ఎన్ఎఫ్ఎస్ఏ కార్డులకు సంబంధించిన తన కోటాను ఇప్పటికే కేటాయించింది. రాష్ట్ర ప్రభుత్వం కూడా త్వరలోనే తన కోటాకు సంబంధించిన కేటాయింపులను ప్రకటించనుంది. మొదటి దశలో కేటాయించిన బియ్యం జిల్లాలలోని గోదాములకు చేరుతుంది.
ఆ తర్వాత.. ఈనెల 20వ తేదీ నుంచి గోదాముల్లో ఉన్న బియ్యాన్ని రేషన్ షాపులకు తరలించే ప్రక్రియ మొదలవుతుంది. ఇక సెప్టెంబర్ 1వ తేదీ నుంచి లబ్ధిదారులకు బియ్యం పంపిణీ ప్రారంభమవుతుంది. ప్రభుత్వం కొత్తగా మంజూరు చేసిన కార్డుదారులందరికీ బియ్యం అందించేందుకు పటిష్ఠమైన ఏర్పాట్లు చేస్తోంది. ఇది ఎంతోమంది పేద కుటుంబాలకు ఆర్థికంగా ఎంతో ఊరట కలిగిస్తుంది.
