|
|
by Suryaa Desk | Fri, Jun 06, 2025, 01:38 PM
బీజేపీ ఎంపీ ఈటల రాజేందర్ మాట్లాడుతూ, కాళేశ్వరం ప్రాజెక్టుకు సంబంధించి అన్ని చర్యలు అప్పటి రాష్ట్ర కేబినెట్ ఆమోదంతోనే తీసుకున్నామని స్పష్టం చేశారు. కాళేశ్వరం లిఫ్ట్ ఇరిగేషన్ ప్రాజెక్టుపై కమీషన్ విచారణ ముగిసిన అనంతరం ఆయన మీడియాతో మాట్లాడుతూ పలు కీలక అంశాలను వెల్లడించారు.
ఈటల పేర్కొన్న వివరాల ప్రకారం, బ్యారేజీల నిర్మాణ ప్రదేశాల మార్పు, నిధుల విడుదల వంటి ప్రతి అంశం కూడా కేబినెట్ నిర్ణయాలతోనే అమలైందన్నారు. ప్రాజెక్టు ప్రారంభ సమయంలో దానిని రూ. 63 వేల కోట్ల వ్యయంతో నిర్మించేందుకు ప్రణాళిక రూపొందించినట్టు చెప్పారు. కానీ కాలక్రమంలో వ్యయం భారీగా పెరిగి రూ. 83 వేల కోట్లకు చేరిందన్నారు.
ఈటల రాజేందర్ మాటల్లో నిపుణుల సలహాలు, అవసరాలు, నీటి లభ్యత వంటి అంశాలను దృష్టిలో ఉంచుకుని నిర్ణయాలు తీసుకున్నామని తెలిపారు. కాళేశ్వరం ప్రాజెక్టుపై విచారణ కొనసాగిన సమయంలో వచ్చిన పలు ఆరోపణలపై కూడా సమాధానం ఇచ్చిన ఈటల, రాజకీయ ప్రయోజనాల కోసం వాస్తవాలను వక్రీకరించవద్దని హితవు పలికారు.
