|
|
by Suryaa Desk | Thu, Oct 02, 2025, 05:52 PM
టాలీవుడ్ అగ్ర కథానాయకుడు జూనియర్ ఎన్టీఆర్, కన్నడ చిత్రం 'కాంతార ఛాప్టర్ 1' బృందంపై ప్రశంసల వర్షం కురిపించారు. నేడు దసరా (అక్టోబరు 2) విడుదలైన ఈ సినిమా బ్లాక్ బస్టర్ విజయం సాధించినందుకు చిత్ర బృందానికి ఆయన శుభాకాంక్షలు తెలిపారు. ఈ మేరకు సోషల్ మీడియా వేదికగా తన అభిప్రాయాన్ని పంచుకున్నారు. ముఖ్యంగా, చిత్ర దర్శకుడు మరియు కథానాయకుడు రిషబ్ శెట్టి ప్రతిభను ఆయన ప్రత్యేకంగా కొనియాడారు."నటుడిగా అద్భుతంగా రాణిస్తూనే, దర్శకుడిగానూ అసాధారణ ప్రతిభ చూపించి రిషబ్ శెట్టి ఊహించని విజయాన్ని అందుకున్నారు" అని ఎన్టీఆర్ తన పోస్ట్లో పేర్కొన్నారు. రిషబ్ శెట్టి విజన్ను నమ్మి, ధైర్యంగా ఆయనకు మద్దతుగా నిలిచిన నిర్మాణ సంస్థ హోంబలే ఫిల్మ్స్తో పాటు, నటీనటులు, సాంకేతిక బృందానికి కూడా తన శుభాకాంక్షలు తెలియజేశారు.జూనియర్ ఎన్టీఆర్ ప్రశంసలపై హోంబలే ఫిల్మ్స్ నిర్మాణ సంస్థ స్పందించింది. తారక్ అందించిన హృదయపూర్వక అభినందనలకు కృతజ్ఞతలు తెలుపుతూ బదులిచ్చింది. "తారక్ గారూ, మీ ప్రశంసలకు మా ధన్యవాదాలు. మీ మద్దతు మాకు ఎంతో విలువైంది, ప్రపంచమంత బలాన్ని ఇస్తుంది" అని తమ అధికారిక సోషల్ మీడియా ఖాతాలో పేర్కొంది. ఒక ప్రముఖ తెలుగు నటుడు కన్నడ సినిమాను మెచ్చుకోవడం, దానికి నిర్మాణ సంస్థ కృతజ్ఞతలు తెలుపడంతో ఈ పోస్టులు ప్రస్తుతం నెట్టింట వైరల్ అవుతున్నాయి.
Latest News