|
|
by Suryaa Desk | Fri, May 16, 2025, 05:00 PM
వర్షాకాలం వ్యవసాయ వరిపంట సీజన్ ప్రారంభానికి సమీపిస్తున్న ఈ వేళ, యాసంగి కాలంలో పండిన వరి కొయ్యలు కాల్చడం మంచిది కాదని, రైతులు అలాంటి చర్యలకు దూరంగా ఉండాలని ఎండపల్లి మండల వ్యవసాయ అధికారి కమల్ల మహేష్ కోరారు.
రైతులకు పలు సూచనలు, సలహాలు అందించిన మహేష్ మాట్లాడుతూ, వరి కొయ్యలు కాల్చడం వల్ల పర్యావరణానికి, భూమికి తీవ్రమైన నష్టం జరుగుతుందన్నారు. ఈ చర్య వల్ల గాలి కాలుష్యం పెరిగి ప్రజారోగ్యం పై దుష్ఫలితాలు చూపవచ్చని చెప్పారు.
అదే సమయంలో, వరి కొయ్యలను భూమిలో కలియదున్నడం ద్వారా నేలలోని సేంద్రియ కర్బన శాతం పెరుగుతుందని, ఇది భూమి సారాన్ని మెరుగుపరచడంతో పాటు, పంట దిగుబడులు కూడా పెరగడానికి సహాయపడుతుందని వివరించారు.
"రైతులు ఎట్టి పరిస్థితుల్లోనూ వరి కొయ్యలు కాల్చకూడదు. భవిష్యత్ పంటల ఆరోగ్యానికీ, ప్రకృతి పరిరక్షణకీ ఇది అత్యంత కీలకం," అని కమల్ల మహేష్ పిలుపునిచ్చారు. రైతులు ఈ విషయాన్ని లోతుగా ఆలోచించి, ప్రకృతి సహజ విధానాలను అనుసరించాలని ఆయన సూచించారు.
