రేడియల్ రోడ్డు పనుల్లో చెట్ల తొలగింపునకు అటవీ శాఖ అనుమతి తప్పనిసరి:పరిగి ఎఫ్ఆర్ఓ ప్రతిమ
దోమ, మేజర్ న్యూస్: పరిగి నియోజకవర్గంలో చేపడుతున్న రేడియల్ రోడ్డు విస్తరణ పనుల్లో భాగంగా రహదారికి ఇరువైపులా ఉన్న చెట్లను తొలగించాలంటే తప్పనిసరిగా అటవీ శాఖ అనుమతి పొందాలని పరిగి ఫారెస్ట్ రేంజ్ ఆఫీసర్ (ఎఫ్ఆర్ఓ) ప్రతిమ స్పష్టం చేశారు. ఈ మేరకు గురువారం ఆమె ప్రకటన విడుదల చేశారు. అనుమతులు లేకుండా పట్టా భూములు, ప్రైవేటు స్థలాలు, ప్రభుత్వ భూములు లేదా అటవీ భూముల్లో ఎక్కడైనా చెట్లను నరికివేయడం అటవీ చట్టాల ప్రకారం నేరమని పేర్కొన్నారు. రోడ్డు విస్తరణ పనులు చేపట్టే క్రమంలో సంబంధిత శాఖల అధికారులు, కాంట్రాక్టర్లు, భూముల యజమానులు అటవీ శాఖ నిబంధనలను తప్పనిసరిగా పాటించాలని సూచించారు. ఎవరైనా అనుమతులు లేకుండా అక్రమంగా చెట్లను తొలగించినట్లు గుర్తిస్తే వారిపై చట్టపరమైన కఠిన చర్యలు తీసుకోవడంతో పాటు భారీ జరిమానాలు విధిస్తామని ఆమె హెచ్చరించారు.