జడ్పీ చైర్పర్సన్గా కొరికాన భవాని ప్రమాణ స్వీకారం
-- వైస్ చైర్మన్గా గుంటు విజయ్ కుమార్ బాధ్యతల స్వీకారం
మేజర్ న్యూస్- శ్రీకాకుళం:
జిల్లా పరిషత్ చైర్పర్సన్గా ఎల్.ఎన్.పేట జడ్పీటీసీ కొరికాన భవాని (జనసేన), వైస్ చైర్మన్గా వజ్రపుకొత్తూరు జడ్పీటీసీ సభ్యుడు గుంటు విజయ్ కుమార్ (తెదేపా) శుక్రవారం ప్రమాణ స్వీకారం చేశారు. జిల్లా పరిషత్ సమావేశ మందిరంలో శుక్రవారం మధ్యాహ్నం నిర్వహించిన ఈ కార్యక్రమంలో ముందుగా జిల్లాలోని 30 మండలాల జడ్పీటీసీ సభ్యులతో జిల్లా ఎన్నికల అధికారి, కలెక్టర్ స్వప్నిల్ దినకర్ పుండ్కర్ ప్రమాణం చేయించారు. అనంతరం పరోక్ష ఎన్నికల ప్రక్రియను నిర్వహించారు.
జడ్పీ చైర్పర్సన్ పదవికి కొరికాన భవాని పేరును హిరమండలం, ఆమదాలవలస జడ్పీటీసీ సభ్యులు సిరిపురం త్రివేణి, తమ్మినేని సుజాత ప్రతిపాదించారు. జనసేన పార్టీ తరఫున బీ-ఫారం అందడం, ఒకే నామినేషన్ దాఖలు కావడంతో ఆమె ఎన్నిక ఏకగ్రీవమైనట్లు కలెక్టర్ ప్రకటించారు. అలాగే వైస్ చైర్మన్ పదవికి గుంటు విజయ్ కుమార్ పేరును ఎచ్చెర్ల, కోటబొమ్మాళి జడ్పీటీసీ సభ్యులు విశ్వక్ సేన్ సయ్యద్, పూజారి శైలజ ప్రతిపాదించగా, తెదేపా బీ-ఫారం అందడంతో ఆయన ఏకగ్రీవంగా ఎన్నికైనట్లు కలెక్టర్ వెల్లడించి ధ్రువీకరణ పత్రాలు అందజేశారు. జిల్లాలోని మొత్తం 30 జడ్పీటీసీ స్థానాల్లో తెదేపా 22, జనసేన 5, భాజపా 2, వైకాపా 1 స్థానాల్లో ప్రాతినిధ్యం వహిస్తున్నాయి. ఈ కార్యక్రమంలో కేంద్ర మంత్రి కింజరాపు రామ్మోహన్ నాయుడు, రాష్ట్ర మంత్రి కింజరాపు అచ్చెన్నాయుడు, ఎమ్మెల్యేలు కూన రవికుమార్, బగ్గు రమణమూర్తి, మామిడి గోవిందరావు, గొండు శంకర్, గౌతు శిరీష, సుడా చైర్మన్ కొరికాన రవికుమార్, జడ్పీ సీఈవో వెంకటరమణ, డిప్యూటీ సీఈవో భారతి సౌజన్య తదితరులు పాల్గొన్నారు.