పెనుగొల్లులో చలో ఢిల్లీ పోస్టర్ విడుదల!
కార్మికులతో వెట్టిచాకిరీ... లేబర్ కోడ్స్ రద్దు చేయాలి
సిఐటియు జిల్లా అధ్యక్షులు వి.వి.శ్రీనివాసరావు
ఎస్.రాయవరం, నవంబర్ 20, మేజర్ న్యూస్:
డిసెంబర్ 1న జరిగే చలో ఢిల్లీ కార్యక్రమాన్ని జయప్రదం చేయాలని సిఐటియు జిల్లా అధ్యక్షులు వి.వి.శ్రీనివాసరావు పిలుపునిచ్చారు. పెనుగొల్లు ప్రాథమిక ఆరోగ్య కేంద్రం వద్ద 'ఛలో ఢిల్లీ' పోస్టర్ ఆవిష్కరణలో ఆయన మాట్లాడారు.
లేబర్ కోడ్స్ రద్దు, కనీస వేతనాల అమలు, ఉద్యోగ భద్రత, కాంట్రాక్ట్ వ్యవస్థ రద్దు, అసంఘటిత కార్మికులకు సమగ్ర చట్టం చేయాలని డిమాండ్ చేశారు. 'ఢిల్లీని ముట్టడిద్దాం' నినాదంతో ఈ కార్యక్రమం జరుగుతుందన్నారు.
ఏపీలో కనీస వేతనాల జీవో సవరించి 12 ఏళ్లయినా ప్రభుత్వం స్పందించలేదని, 8 గంటల పనిని 10 గంటలకు పెంచి కార్మికులతో వెట్టిచాకిరీ చేయిస్తున్నారని విమర్శించారు. అంగన్వాడీ, ఆశా, మధ్యాహ్న భోజనం, స్కూల్ ఆయాలను ప్రభుత్వ ఉద్యోగులుగా గుర్తించాలని అన్నారు.
ఈ కార్యక్రమంలో జిల్లా కార్యదర్శి మనబాల రాజేష్, ఆశా యూనియన్ నాయకులు మంగవేణి, వెంకటలక్ష్మి తదితరులు పాల్గొన్నారు.