ఆనందపురం నూతన ఎంపీపీ, వైస్ ఎంపీపీ, ఎంపీటీసీలకు ఎమ్మెల్యే గంటా ఘన సత్కారం
డిసెంబర్ 2 పంచాయతీ ఎన్నికల్లోనూ కూటమి క్లీన్ స్వీప్ చేయాలి : గంటా శ్రీనివాసరావు
ఆనందపురం, మేజర్ న్యూస్ : ఆనందపురం మండల నూతన ఎంపీపీ తాట్రాజు అప్పారావు, వైస్ ఎంపీపీలు, ఎంపీటీసీ విజేతలను భీమిలి పార్టీ కార్యాలయంలో ఎమ్మెల్యే గంటా శ్రీనివాసరావు శుక్రవారం ఘనంగా సత్కరించారు.
ఈ కార్యక్రమంలో ఎమ్మెల్యే గంటా శ్రీనివాసరావు నూతనంగా ఎన్నికైన ప్రజాప్రతినిధులకు శాలువాలు కప్పి, పూలమాలలు వేసి అభినందనలు తెలిపారు. మండలంలో తెలుగుదేశం పార్టీకి, కూటమికి లభించిన ఘన విజయం పట్ల ఆయన హర్షం వ్యక్తం చేశారు.
ఈ సందర్భంగా ఎమ్మెల్యే మాట్లాడుతూ, ప్రజలు తమపై ఉంచిన నమ్మకాన్ని నిలబెట్టుకోవాల్సిన బాధ్యత ప్రతి ప్రజాప్రతినిధిపై ఉందని అన్నారు. మండలంలోని ప్రతి గ్రామంలోనూ బలమైన ముద్ర వేసేలా అభివృద్ధి పనులు చేపట్టాలని సూచించారు. రోడ్లు, తాగునీరు, పారిశుధ్యం, వీధి దీపాలు వంటి మౌలిక సదుపాయాలపై ప్రత్యేక దృష్టి పెట్టాలన్నారు.
ప్రజా సమస్యల పరిష్కారానికి ఎల్లప్పుడూ అందుబాటులో ఉండాలని, నాయకులు, కార్యకర్తలు అందరూ సమన్వయంతో పనిచేయాలని ఆయన పిలుపునిచ్చారు. ముఖ్యంగా డిసెంబర్ 2న జరిగే పంచాయతీ ఎన్నికల్లోనూ కూటమి క్లీన్ స్వీప్ చేసేలా ఇప్పటి నుంచే క్షేత్రస్థాయిలో పకడ్బందీగా పనిచేయాలని సూచించారు.
నూతన ఎంపీపీ తాట్రాజు అప్పారావు మాట్లాడుతూ, తనకు అవకాశం కల్పించిన పార్టీ అధిష్టానానికి, ఎమ్మెల్యే గంటా శ్రీనివాసరావుకు,తన విజయానికి కృషి చేసిన ఎంపీటీసీలకు,నాయకులు, కార్యకర్తలు, ప్రజలకు కృతజ్ఞతలు తెలిపారు. ఆనందపురం మండలాన్ని అభివృద్ధిలో ముందంజలో నిలిపేందుకు కృషి చేస్తానని హామీ ఇచ్చారు.
ఈ కార్యక్రమంలో పార్టీ నాయకులు, కార్యకర్తలు, అభిమానులు పెద్ద సంఖ్యలో పాల్గొన్నారు.