కనీవినీ ఎరుగని రీతిలో అలుగునూరులో ‘దీక్షా దివస్’ సభ - ముఖ్య అతిథిగా హాజరుకానున్న బీఆర్ఎస్ వర్కింగ్ ప్రెసిడెంట్ కేటీఆర్
సూర్య - మానకొండూర్ : నాలుగు దశాబ్దాలకు పైగా సాగిన కాంగ్రెస్ దోబూచులాటకు ముగింపు పలుకుతూ, 'కేసీఆర్ సచ్చుడో.. తెలంగాణ వచ్చుడో' అన్న నినాదంతో ఆమరణ నిరాహార దీక్షకు పూనుకున్న నవంబర్ 29 తెలంగాణ చరిత్రను మలుపుతిప్పిన పవిత్ర దినమని కరీంనగర్ ఎమ్మెల్యే గంగుల కమలాకర్ పేర్కొన్నారు.మానకొండూర్ శివారులోని అలుగునూరు వద్ద నిర్వహించనున్న ‘దీక్షా దివస్’ సభా ప్రాంగణాన్ని శనివారం ఆయన బీఆర్ఎస్ ముఖ్య నేతలతో కలిసి సందర్శించారు. మాజీ ఎంపీ బోయినపల్లి వినోద్ కుమార్, మాజీ ఎమ్మెల్యే రసమయి బాలకిషన్, ఎమ్మెల్యే డాక్టర్ సంజయ్ కుమార్, మాజీ ఎమ్మెల్సీ నారదాసు లక్ష్మణరావు, కరీంనగర్ జిల్లా బీఆర్ఎస్ అధ్యక్షుడు జి.వి. రామకృష్ణారావుతో కలిసి సభా ఏర్పాట్లు, పనుల పురోగతిని పరిశీలించారు.అనంతరం ఎమ్మెల్యే గంగుల కమలాకర్ మీడియాతో మాట్లాడుతూ.. 1969 ఉద్యమం నుండి 50 ఏళ్ల పాటు తెలంగాణ ప్రజలను కాంగ్రెస్ పార్టీ మోసం చేస్తూ ఉద్యమాలను అణచివేసిందని విమర్శించారు. ఆత్మబలిదానాలతోనైనా రాష్ట్రాన్ని సాధించాలనే లక్ష్యంతో 2009 నవంబర్ 29న కేసీఆర్ ఆమరణ దీక్షకు బయలుదేరగా, అలుగునూరు వద్ద అక్రమంగా అరెస్ట్ చేయడంతో రాష్ట్రవ్యాప్తంగా ఉద్యమం ఉవ్వెత్తున ఎగిసిందని గుర్తుచేశారు. ఆనాడు కేసీఆర్ దీక్షకు పూనుకోకపోతే తెలంగాణ రాష్ట్రం వచ్చేది కాదని, పదేళ్ల అభివృద్ధి సాధ్యమయ్యేది కాదని అన్నారు.
భూమి, గాలి ఉన్నంతవరకు దీక్షా దివస్:
దీక్షా దివస్ అనేది కేవలం బీఆర్ఎస్ పార్టీ కార్యక్రమం మాత్రమే కాదని, ఇది యావత్ తెలంగాణ ప్రజల ఆత్మగౌరవానికి ప్రతీక అని గంగుల స్పష్టం చేశారు. రాష్ట్ర ఏర్పాటు నాటి చరిత్రను నేటి తరానికి తెలియజేయాల్సిన బాధ్యత తమపై ఉందని, భూమిపై గాలి ఉన్నంతవరకు ప్రతి ఏటా దీక్షా దివస్ నిర్వహిస్తామని తెలిపారు. అలుగునూరును ఒక పవిత్ర స్థలంగా భావిస్తూ, కవులు, కళాకారులు, అమరవీరుల కుటుంబాల సమక్షంలో కనీవినీ ఎరుగని రీతిలో ఈ వేడుకను నిర్వహిస్తున్నామని చెప్పారు.
వేలాదిగా తరలివచ్చి విజయవంతం చేయాలి:ఈ మహాసభకు బీఆర్ఎస్ రాష్ట్ర వర్కింగ్ ప్రెసిడెంట్ కేటీఆర్ ముఖ్య అతిథిగా హాజరవుతున్నారని కమలాకర్ వెల్లడించారు. ప్రజలకు ఎలాంటి అసౌకర్యం కలగకుండా రానున్న నాలుగైదు రోజుల్లో సభా ఏర్పాట్లన్నీ పూర్తి చేస్తామని తెలిపారు. పార్టీలకు అతీతంగా తెలంగాణ ప్రజలందరూ స్వచ్ఛందంగా వేలాది సంఖ్యలో తరలివచ్చి అలుగునూరు దీక్షా దివస్ సభను విజయవంతం చేయాలని ఆయన పిలుపునిచ్చారు.