మాచవరం గ్రామ సర్పంచ్ అభ్యర్థి మైపాల తాతాజీ ముమ్మర ఎన్నికల ప్రచారం..
సూర్య రీజినల్ & పొలిటికల్ డెస్క్ (మాచవరం):పంచాయతీల ఎన్నికలు సమీపిస్తున్న తరుణంలో మాచవరం గ్రామ రాజకీయాలు మరింత వేడెక్కాయి.కూటమి బలపర్చిన గ్రామ సర్పంచి అభ్యర్థిగా బరిలో నిలిచిన మైపాల తాతాజీ ఎన్నికల ప్రచారాన్ని ముమ్మరం చేశారు. తన మద్దతుదారులు, అనుచరులతో కలిసి గ్రామంలోని మెట్ల కాలనీ, షాదిఖానా ప్రాంతం, డైలీ మార్కెట్, గౌడ స్ట్రీట్లలో ఇంటింటికీ తిరుగుతూ ఓటర్ల ఆశీర్వాదం తీసుకున్నారు.
ప్రచారంలో భాగంగా డైలీ మార్కెట్లోని చిరు వ్యాపారులు, మెట్ల కాలనీ,గౌడ స్ట్రీట్ నివాసితులతో మైపాల తాతాజీ నేరుగా మాట్లాడి వారి సమస్యలను అడిగి తెలుసుకున్నారు. తాను సర్పంచిగా ఎన్నికైతే ఆయా కాలనీలలో అంతర్గత సిమెంట్ రోడ్లు, డ్రైనేజీ వ్యవస్థ ఆధునీకరణ, స్వచ్ఛమైన తాగునీటి సరఫరా, వీధి దీపాల ఏర్పాటుకు మొదటి ప్రాధాన్యత ఇస్తానని,డైలీ మార్కెట్ పరిసరాలలో పారిశుద్ధ్య మెరుగుదల, వ్యాపారులకు అవసరమైన మౌలిక సదుపాయాలు కల్పిస్తామని భరోసానిచ్చారు.
ఇంటింటి ప్రచారంలో భాగంగా ఆయా వీధుల ప్రజలు, మహిళలు,పెద్దలు,యువకులు ఆయనకు ఘన స్వాగతం పలుకుతూ తమ సంపూర్ణ మద్దతును ప్రకటించారు. రాబోయే పోలింగ్ తేదీ నాడు తన ఎన్నికల గుర్తుపై ఓటు వేసి అత్యధిక మెజారిటీతో గెలిపించాలని ఆయన గ్రామ ప్రజలను అభ్యర్థించారు.