telangana
డ్రగ్స్కు దూరంగా ఉండాలి.. ఉజ్వల భవిష్యత్తును నిర్మించుకోవాలి:ఘట్కేసర్ సీఐ పి. కిరణ్
ఘట్కేసర్, మేజర్ న్యూస్:మాదకద్రవ్యాల వినియోగం యువత జీవితాలను నాశనం చేయడమే కాకుండా వారి భవిష్యత్తును అంధకారంలోకి నెడుతుందని ఘట్కేసర్ సీఐ పి. కిరణ్ అన్నారు. డ్రగ్స్కు అలవాటు పడకుండా విద్యార్థులు అప్రమత్తంగా ఉండాలని సూచించారు. పోలీస్ కమిషనర్ ఆదేశాల మేరకు ఘట్కేసర్ పోలీసుల ఆధ్వర్యంలో ఔషాపూర్లోని ఆల్ఫోర్స్ కళాశాలలో శనివారం యాంటీ డ్రగ్ అవగాహన కార్యక్రమం నిర్వహించారు. ఈ సందర్భంగా సీఐ పి. కిరణ్ మాట్లాడుతూ మాదకద్రవ్యాల వినియోగం వల్ల శారీరక, మానసిక ఆరోగ్యంపై తీవ్ర ప్రభావం పడటంతో పాటు విద్యాభ్యాసం, వ్యక్తిగత జీవితం దెబ్బతింటాయని తెలిపారు. తోటి వారి ఒత్తిడికి, చెడు స్నేహాలకు లోనై డ్రగ్స్కు బానిసలు కావద్దని విద్యార్థులకు సూచించారు. డ్రగ్స్కు సంబంధించిన కార్యకలాపాలు ఎక్కడైనా గుర్తిస్తే వెంటనే పోలీసులకు సమాచారం అందించాలని కోరారు. యువత దేశ భవిష్యత్తుకు పునాదులని, వారు చెడు వ్యసనాలకు దూరంగా ఉంటూ లక్ష్యసాధన దిశగా ముందుకు సాగాలని పేర్కొన్నారు. ఈ సందర్భంగా విద్యార్థులతో 'యాంటీ డ్రగ్ సోల్జర్స్' ప్రతిజ్ఞ చేయించి, మాదకద్రవ్యాల రహిత సమాజ నిర్మాణంలో భాగస్వాములు కావాలని పిలుపునిచ్చారు. ఈ కార్యక్రమంలో ఎస్సై హీన, కానిస్టేబుల్ లు పాల్గొన్నారు.