ఆరు సంవత్సరాల సర్వీసు పూర్తి చేసిన వార్డు సచివాలయ ఉద్యోగులకు ఆటోమేటిక్ అడ్వాన్స్ స్కీమ్ అమలు చేయాలి.. ఆర్డీఎంఏకు రాష్ట్ర సంఘ నాయకుల వినతి.. తక్షణ చర్యలు తీసుకుంటామని హామీ
(అనంతపురం కార్పొరేషన్ మేజర్ న్యూస్..)
ఆరు సంవత్సరాల సర్వీసు పూర్తి చేసిన ప్రతి వార్డు సచివాలయ ఉద్యోగికి ఆటోమేటిక్ అడ్వాన్స్ స్కీమ్ ఏఏఎస్ తక్షణమే అమలు చేయాలని రాయలసీమ ప్రాంతీయ పురపాలక పరిపాలన సంచాలకుడు నాగరాజుకు రాష్ట్ర సంఘ నాయకులు విజ్ఞప్తి చేశారు.ఈ మేరకు అనంతపురంలో రాయలసీమ ప్రాంతీయ పురపాలక పరిపాలన సంచాలకుడిని ఏపీ వార్డు సచివాలయ ప్రభుత్వ ఉద్యోగుల సంఘం, ఏపీ ప్రభుత్వ వార్డు సచివాలయ ఉద్యోగుల సమాఖ్య రాష్ట్ర నాయకులు కలిసి వినతిపత్రం అందజేశారు.
ఈ సందర్భంగా నాయకులు మాట్లాడుతూ ఆరు సంవత్సరాల సర్వీసు పూర్తి చేసిన ఉద్యోగులకు అమలు చేయాల్సిన ఆటోమేటిక్ అడ్వాన్స్ స్కీమ్ విషయంలో అనవసర జాప్యం జరుగుతోందని తెలిపారు. అర్హత కలిగిన ప్రతి ఉద్యోగికి ఎలాంటి ఆలస్యం లేకుండా వెంటనే ఏఏఎస్ ప్రయోజనాలు కల్పించేలా చర్యలు తీసుకోవాలని కోరారు. దీనిపై ప్రాంతీయ పురపాలక పరిపాలన సంచాలకుడు నాగరాజు స్పందిస్తూ, తన పరిధిలో ఉన్న ఐదు మున్సిపల్ కార్పొరేషన్లు, 37 మున్సిపాలిటీలలో ఆటోమేటిక్ అడ్వాన్స్ స్కీమ్ అమలు విషయంపై తక్షణమే చర్యలు తీసుకుంటామని హామీ ఇచ్చారు.ఈ కార్యక్రమంలో రాష్ట్ర నాయకులు డి. సుధాకర్, వి. లక్ష్మీనారాయణ, ఎం.కె. వరప్రసాద్, అనంతపురం జిల్లా నాయకులు మల్లికార్జున, సి. రామచంద్ర, చిన్నూరప్ప, శివశంకర్, రామకృష్ణ, మహేష్, రాజశేఖర్ తదితరులు పాల్గొన్నారు.