అన్నారం వద్ద రోడ్డు ప్రమాదం: బైక్‌ను కట్ చేస్తూ ఢీకొట్టిన ఇసుక లారీ.. యువకుడికి తీవ్ర గాయాలు!
సూర్య - మానకొండూర్ : మండల పరిధిలోని అన్నారం పెట్రోల్ బంక్ మలుపు వద్ద మంగళవారం ఒక రోడ్డు ప్రమాదం జరిగింది. కరీంనగర్ వైపు వెళ్తున్న ఇసుక లారీ.. అదే దిశలో వెళ్తున్న ద్విచక్ర వాహనాన్ని ఓవర్‌టేక్ చేస్తూ ఢీకొట్టిన ఘటనలో ఒక యువకుడు తీవ్రంగా గాయపడ్డాడు.స్థానికుల కథనం ప్రకారం.. మానకొండూరు మండలం మద్దికుంట గ్రామానికి చెందిన చిల్ల అనిల్, వీణవంక మండలం ఉప్పరపల్లె గ్రామానికి చెందిన కొలిపాక అంజిలు మద్దికుంటలో జరగబోయే ఒక కార్యానికి సంబంధించి సామాగ్రి తీసుకురావడానికి ద్విచక్ర వాహనంపై కరీంనగర్ బయలుదేరారు. మార్గమధ్యలో అన్నారం పెట్రోల్ బంకు మలుపు వద్దకు రాగానే, వీరి బైక్ వెనుక నుండి వచ్చిన ఒక ఇసుక లారీ.. సైడ్ నుండి వెళ్తున్న బైక్‌ను నిర్లక్ష్యంగా కట్ చేస్తూ బలంగా తాకించింది.
లారీ కట్ చేస్తూ తాకడంతో ద్విచక్ర వాహనం నియంత్రణ కోల్పోయి రోడ్డుపై పడిపోయింది. ఈ ప్రమాదంలో బైక్ వెనుక కూర్చున్న కొలిపాక అంజికి శరీరమంతా తీవ్ర రక్తగాయాలయ్యాయి. ప్రమాదం జరిగిన వెంటనే లారీ డ్రైవర్ వాహనాన్ని ఆపకుండా వేగంగా దూసుకుపోయాడు. లారీ డ్రైవర్ అతివేగం, నిర్లక్ష్యపు డ్రైవింగ్ వల్లే ఈ ప్రమాదం జరిగిందని బాధితులు తెలిపారు. ప్రమాదాన్ని గమనించిన స్థానికులు వెంటనే 108 అంబులెన్స్‌కు సమాచారం అందించి, తీవ్రంగా గాయపడిన అంజిని చికిత్స నిమిత్తం కరీంనగర్ ప్రభుత్వ ఆసుపత్రికి తరలించారు. బైక్ నడుపుతున్న అనిల్ తృటిలో ప్రమాదం నుండి తప్పించుకున్నారు.ఈ మార్గంలో ఇసుక లారీల రద్దీ విపరీతంగా పెరిగిపోయిందని, లారీ డ్రైవర్లు మలుపుల వద్ద కూడా మితిమీరిన వేగంతో వాహనాలు నడుపుతూ ఇతర వాహనదారుల ప్రాణాలతో చెలగాటమాడుతున్నారని గ్రామస్తులు తీవ్ర ఆగ్రహం వ్యక్తం చేస్తున్నారు. ప్రమాదం జరిగిన సమయంలో లారీ, బైక్ రెండూ కూడా ఒకే వైపు మలుపు తిరుగుతున్నట్లు తెలుస్తోంది. ఈ ప్రమాదంపై పూర్తి వివరాలు తెలియాల్సి ఉంది.
