మూడు ఎంపీటీసీ స్థానాలు ఏకగ్రీవం

నేటి దినపత్రిక సూర్య బ్యూరో రాజమహేంద్రవరంఅనపర్తి మండలంలో స్థానిక సంస్థల ఎన్నికల సమరం తుది అంకానికి చేరుకుంది. జడ్పీటీసీ, ఎంపీటీసీ స్థానాలకు నామినేషన్ల ఉపసంహరణ ప్రక్రియ ముగియడంతో పోటీలో నిలిచిన అభ్యర్థుల సంఖ్య స్పష్టమైంది. జడ్పీటీసీ స్థానానికి నలుగురు అభ్యర్థులు పోటీ పడుతుండగా, మండలంలోని 20 ఎంపీటీసీ స్థానాలకు గాను మూడు స్థానాలు ఏకగ్రీవమయ్యాయి. మిగిలిన 17 స్థానాల్లో 52 మంది అభ్యర్థులు ఎన్నికల బరిలో నిలిచారు. దీంతో మండలంలో రాజకీయ వాతావరణం వేడెక్కింది. అనపర్తి జడ్పీటీసీ స్థానాన్ని దక్కించుకునేందుకు నాలుగు వేర్వేరు అభ్యర్థులు బరిలో నిలిచారు. తెలుగుదేశం పార్టీ, వైఎస్సార్ కాంగ్రెస్ పార్టీ, కాంగ్రెస్ పార్టీ తరఫున ఒక్కొక్కరు, మరోవైపు ఒక స్వతంత్ర అభ్యర్థి పోటీలో ఉన్నారు. దీంతో ఈ స్థానంలో చతుర్ముఖ పోటీ నెలకొంది. ప్రధాన పార్టీల అభ్యర్థులు తమకు అనుకూలంగా ఓటర్లను ఆకర్షించేందుకు ప్రయత్నాలు ముమ్మరం చేయనున్నారు. అనపర్తి మండల పరిధిలో మొత్తం 20 ఎంపీటీసీ స్థానాలు ఉండగా, మూడు స్థానాలు ఏకగ్రీవం కావడంతో మిగిలిన 17 స్థానాలకు ఎన్నికలు జరగనున్నాయి. ఈ స్థానాల్లో మొత్తం 52 మంది అభ్యర్థులు పోటీలో నిలిచారు.పార్టీల వారీగా పరిశీలిస్తే వైఎస్సార్ కాంగ్రెస్ పార్టీ నుంచి 17 మంది, తెలుగుదేశం పార్టీ నుంచి 13 మంది, భారతీయ జనతా పార్టీ నుంచి ఇద్దరు, జనసేన పార్టీ నుంచి ఇద్దరు, స్వతంత్ర అభ్యర్థులుగా 18 మంది పోటీ చేస్తున్నారు. స్వతంత్ర అభ్యర్థుల సంఖ్య 18గా ఉండటం ఈ ఎన్నికల్లో ప్రత్యేకంగా కనిపిస్తోంది.ప్రధాన పార్టీల అభ్యర్థులతో పాటు స్వతంత్ర అభ్యర్థులు కూడా బరిలో ఉండటంతో పలు స్థానాల్లో పోటీ ఆసక్తికరంగా మారే అవకాశం ఉంది. గ్రామస్థాయిలో అభ్యర్థుల వ్యక్తిగత పరిచయాలు, స్థానిక సమస్యలపై వారి అవగాహన, ప్రజలతో ఉన్న సంబంధాలు ఓటర్ల నిర్ణయాన్ని ప్రభావితం చేయనున్నాయి.మండలంలోని మూడు ఎంపీటీసీ స్థానాలు ఏకగ్రీవంగా ఎన్నికయ్యాయి. స్థానిక ఎమ్మెల్యే నల్లమిల్లి రామకృష్ణారెడ్డి స్వగ్రామమైన రామవరం గ్రామంలో ఎంపీటీసీలు ఏకగ్రీవం  అయ్యాయి. రామవరం-1 స్థానంలో బీజేపీ అభ్యర్థి, రామవరం-2 స్థానంలో స్వతంత్ర అభ్యర్థి, పెడపర్తి ఎంపీటీసీ స్థానంలో తెలుగుదేశం పార్టీ అభ్యర్థి ఏకగ్రీవంగా ఎన్నికయ్యారు. దీంతో ఈ మూడు స్థానాలకు పోలింగ్ నిర్వహించాల్సిన అవసరం లేకుండా పోయింది. అనపర్తి మండలంలో ప్రధానంగా వైఎస్సార్ కాంగ్రెస్ పార్టీ, కూటమి అభ్యర్థుల మధ్య పోటీ తీవ్రంగా ఉండే అవకాశం ఉందని రాజకీయ వర్గాలు అంచనా వేస్తున్నాయి.