కరగాం ఎంపీటీసీ అభ్యర్థిగా పంగ జైచంద్రకుమార్..

-  దంత వైద్యుడికి బీ-ఫారం మంజూరు చేసిన జనసేన .

నరసన్నపేట అక్టోబర్ 27 మేజర్ న్యూస్: నరసన్నపేట మండలం కరగాం ఎంపీటీసీ అభ్యర్థిగా ప్రముఖ దంత వైద్యుడు పంగ జైచంద్రకుమార్‌కు జనసేన పార్టీ అధిష్ఠానం బీ-ఫారం మంజూరు చేసింది. ఉన్నత విద్యావంతుడైన యువ వైద్యుడికి పార్టీ అవకాశం కల్పించడంపై స్థానికంగా పలువురు హర్షం వ్యక్తం చేశారు.

ఈ సందర్భంగా పంగ జైచంద్రకుమార్ మాట్లాడుతూ ప్రజా సమస్యలపై స్పందిస్తూ, రాజకీయాల్లో యువతను ప్రోత్సహించాలనే ఉద్దేశంతో తనకు పార్టీ అవకాశం కల్పించిందన్నారు. అధిష్ఠానం తనపై ఉంచిన నమ్మకాన్ని నిలబెట్టుకుంటూ, ప్రజా సమస్యల పరిష్కారానికి కృషి చేస్తానని తెలిపారు.

ప్రజా సంక్షేమానికి ప్రభుత్వం అమలు చేసే పథకాలు అర్హులైన ప్రజలకు సక్రమంగా అందేలా తనవంతు ప్రయత్నం చేస్తానని పేర్కొన్నారు. ప్రజల సమస్యలపై నిరంతరం స్పందిస్తూ, వాటి పరిష్కారం కోసం రాజీలేని పోరాటం చేస్తానని వెల్లడించారు.

జనసేన కూటమి అభ్యర్థిగా పోటీ చేస్తున్న తనకు ప్రజలు మద్దతు తెలిపి, గాజు గ్లాసు గుర్తుపై ఓటు వేసి గెలిపించాలని ఓటర్లను కోరారు.
ఈ సందర్భంగా టీడీపీ నాయకులు శిమ్మ లక్ష్మణరావు, వెలమల కామేష్, పీస మోహనరావు, సాధు ఆనందరావు తదితరులు పంగ జైచంద్రకుమార్‌కు మద్దతు తెలిపారు.