ఆనందపురం జడ్పీటీసీ స్థానం జనసేనకు..!!

ఆనందపురం, సూర్య: ఆనందపురం మండల జడ్పీటీసీ స్థానానికి జనసేన పార్టీ అభ్యర్థిగా ఎన్ని శ్రీనివాసరావు ఖరారయ్యారు. కూటమి పొత్తుల్లో భాగంగా ఈ స్థానాన్ని జనసేనకు కేటాయించగా, పార్టీ తరఫున పోటీ చేసేందుకు ఎన్ని శ్రీనివాసరావుకు బీ-ఫారం అందజేశారు. జనసేన భీమిలి నియోజకవర్గ ఇన్‌ఛార్జి పంచకర్ల సందీప్‌  ఆయనకు బీ-ఫారం అందించారు. దీంతో ఆనందపురం మండల జడ్పీటీసీ ఎన్నికల బరిలో జనసేన అభ్యర్థిగా ఆయన పోటీ చేయడం ఖరారైంది.
బీసీ సంక్షేమ సంఘం రాష్ట్ర ప్రధాన కార్యదర్శిగా బాధ్యతలు నిర్వహిస్తున్న ఎన్ని శ్రీనివాసరావు, వెనుకబడిన వర్గాల సంక్షేమం కోసం పలు కార్యక్రమాల్లో భాగస్వాములవుతున్నారు. ఆయా వర్గాల సమస్యల పరిష్కారానికి తనవంతు కృషి చేస్తున్నారు. రాజకీయ అనుభవం కలిగిన కుటుంబ నేపథ్యంతో పాటు, ప్రజాసేవా కార్యక్రమాల ద్వారా స్థానికంగా గుర్తింపు పొందారు. గతంలో మెగాస్టార్ చిరంజీవి స్థాపించిన ప్రజారాజ్యం పార్టీలో పనిచేసిన ఆయన, అనంతరం పవన్ కల్యాణ్ స్థాపించిన జనసేన పార్టీతో అనుబంధాన్ని కొనసాగిస్తున్నారు. ఇప్పటివరకు ప్రత్యక్ష ఎన్నికల్లో పోటీ చేయని ఎన్ని శ్రీనివాసరావు, ఈసారి జడ్పీటీసీ ఎన్నికల ద్వారా ప్రత్యక్ష రాజకీయాల్లోకి అడుగుపెడుతున్నారు. తనకు జడ్పీటీసీ అభ్యర్థిగా అవకాశం కల్పించి, బీ-ఫారం అందజేసిన సందర్భంగా ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్‌, భీమిలి ఎమ్మెల్యే గంటా శ్రీనివాసరావు, జనసేన భీమిలి నియోజకవర్గ ఇన్‌ఛార్జి పంచకర్ల సందీప్‌లకు ఎన్ని శ్రీనివాసరావు కృతజ్ఞతలు తెలిపినట్లు పేర్కొన్నారు. తనపై నమ్మకంతో అభ్యర్థిగా అవకాశం కల్పించిన పార్టీ నాయకత్వానికి కృతజ్ఞతలు తెలుపుతూ, ప్రజలకు అందుబాటులో ఉంటూ వారి సమస్యల పరిష్కారానికి కృషి చేస్తానని తెలిపారు.