ఎల్ నినోను సమర్థవంతంగా ఎదుర్కోవాలి

నంగునూరు:-ఎల్ నినో ప్రభావంతో విపత్కర పరిస్థితిని అర్థం చేసుకొని ప్రజాప్రతినిధులు, అధికారులు సమర్థవంతంగా ఎదుర్కోవాలని జిల్లా తూనికలు కొలతల అధికారి, నంగునూరు మండల ప్రత్యేక అధికారి శివరంజని సూచించారు. సోమవారం నంగునూరు మండల పరిషత్ కార్యాలయంలో ఎంపీడీవో శ్రీనివాస్ అధ్యక్షతన మండల ప్రత్యేక సమావేశం నిర్వహించారు.మార్కెట్ కమిటీ చైర్మన్ దేవులపల్లి యాదగిరి, సొసైటీ చైర్మన్లు కోల రమేశ్ గౌడ్, ఎల్లంకి మహిపాల్ రెడ్డి, కార్యాలయం సూపరిండెంట్ ప్రభాకర్ రావు, మండల విద్యాశాఖ అధికారి తగిరెడ్డి దేశి రెడ్డి తదితరులు హాజరయ్యారు. ఆయా శాఖల అధికారులు తమ నివేదికను సమావేశంలో చదివి వినిపించారు. సమావేశానికి హాజరుకాని శాఖలకు నోటీసులు ఇస్తూ ఆదేశాలు జారీ చేయాలని తీర్మానించారు. ఈ సందర్భంగా వారు మాట్లాడుతూ ఎల్ నినో ప్రభావం అన్ని రంగాలపై పడనుందన్నారు. ఈ సమావేశంలో వివిధ గ్రామాల సర్పంచులు, పంచాయతీ కార్యదర్శులు, ప్రభుత్వ అధికారులు తదితరులు పాల్గొన్నారు.