విభిన్న ప్రతిభావంతులకు ఉచిత భోజనం అందించాలి

ఎడ్యుకేషన్ స్టాఫ్ రిపోర్టర్ : ఎస్వీయూలో విభిన్న ప్రతిభావంతులైన విద్యార్థుల సౌకర్యార్థం నిర్మించిన జనార్ధన్ భవన్ (జే బ్లాక్) హాస్టల్ను వారికే కేటాయించి ఉచిత భోజనవసతిని అందించాలని గిరిజన నవ సమాజ్ వ్యవస్థాపక రాష్ట్ర అధ్యక్షులు శివశంకర్ నాయక్, ట్రైబల్ స్టూడెంట్ ఫెడరేషన్ వ్యవస్థాపకులు చంద్రశేఖర్ నాయక్ డిమాండ్ చేశారు. ఈ మేరకు బుధవారం వీసీ టాటా నర్సింగరావును కలిసి వినతిపత్రం అందజేశారు. గణితశాస్త్ర విభాగానికి చెందిన పూర్వ విద్యార్థి దివంగత ఎస్ జనార్ధన్ జ్ఞాపకార్థం ఆయన కుటుంబ సభ్యులు తమ విరాళంతో విభిన్న ప్రతిభావంతులైన విద్యార్థుల సౌకర్యార్థం జనార్ధన్ భవన్ను నిర్మించి ఉచితంగా అందించారని తెలిపారు. విశిష్ట ప్రతిభతో గణితశాస్త్రంలో పట్టా పొందిన జనార్ధన్, తాను ఎదుర్కొన్న ఇబ్బందులను భవిష్యత్తులో ఇతర విద్యార్థులు ఎదుర్కోకూడదనే ఉద్దేశంతో తన జ్ఞాపకార్థం అనేక సౌకర్యాలతో హాస్టల్ భవనాన్ని నిర్మించారని తెలిపారు. ప్రస్తుతం అధికారులు ఈ భవనంలో ఇతర విద్యార్థులకు కూడా వసతి కల్పించడం వల్ల విభిన్న ప్రతిభావంతులైన విద్యార్థులు తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేశారు. విభిన్న ప్రతిభావంతులైన విద్యార్థులు ఎదుర్కొంటున్న సమస్యలను అధికారులు తక్షణమే పరిష్కరించి, వారి విద్యాభివృద్ధికి సహకరించాలని వారు డిమాండ్ చేశారు.

సీఎం గౌడ్ తిరుపతి స్టాఫ్ రిపోర్టర్