విద్యాశాఖ హామీలన్నీ గాలికే-బత్తిని శ్రీనివాస్ గౌడ్

ఖానాపూర్, మేజర్ న్యూస్, విద్యా శాఖను ఉద్ధరిస్తానని తమ వద్దే ఉంచుకున్న ముఖ్యమంత్రి రేవంత్ రెడ్డి గారు విద్యా శాఖకు కేటాయించిన నిధులు ఎంత? ఇచ్చిన హామీలు ఏమిటో తెలంగాణ ప్రజలకు చెప్పాలని బీఆర్ఎస్ బీసీ సెల్ రాష్ట్ర నాయకులు వరంగల్ జిల్లా జనరల్ సెక్రెటరీ బత్తిని శ్రీనివాస్ గౌడ్ డిమాండ్ చేశారు. విద్యా శాఖకు 2024లో 21,292 కోట్లు, 2025లో 23,108 కోట్లు, 2026లో 26,674 కోట్లు మొత్తం 71,074 కోట్లు కేటాయించారని ఆ నిధులు ఎలా ఖర్చు చేశారో తెలంగాణ ప్రజలకు తెలియజేయాలన్నారు. కాంగ్రెస్ ప్రభుత్వం 2023 నుండి ఇప్పటి వరకు ఇచ్చిన 12 హామీల్లో అభయహస్తం యువ వికాసం, 5 లక్షల విద్యా భరోసా కార్డు, ప్రతి మండలంలో తెలంగాణ ఇంటర్నేషనల్ స్కూల్, ఐఐటి, జెఇఇ, నీట్ ఉచిత శిక్షణ కేంద్రాలు, నెలకు 4000 నిరుద్యోగ భృతి, 18 ఏళ్లు నిండిన విద్యార్థినులకు ఉచిత ఎలక్ట్రిక్ స్కూటీ, 65 ఐటిఐలను సెంటర్స్ ఆఫ్ ఎక్సలెన్స్ గా మార్చడం, ప్రతి మండలంలో ఎస్సీ, ఎస్టీ, బీసీ గురుకుల భవనాల నిర్మాణం, ఎస్సీ, ఎస్టీలకు కేజీ టు పీజీ ఉచిత విద్య, ప్రతి ఏటా జాబ్ క్యాలెండర్, 2 లక్షల ఉద్యోగాలు, పబ్లిక్ స్కూల్స్ ను మోడల్ స్కూల్స్ గా తీర్చిదిద్దడం, ఉన్నత విద్య అభ్యసించిన ఎస్సీ, ఎస్టీ నిరుద్యోగులకు లక్ష నుండి 5 లక్షల వరకు ప్రోత్సాహకాలు వంటి హామీల్లో ఒక్కటీ నెరవేరలేదని ఇవన్నీ కాంగ్రెస్ అధికారంలోకి రావడానికి చేసిన అబద్ధపు హామీలేనని మూడేళ్లు గడుస్తున్నా ఒక్క పథకం కూడా కార్యరూపం దాల్చలేదని ఇది కాంగ్రెస్ గారడీ అని విమర్శించారు.

రిపోర్టర్; అనిల్ కుమార్ ,ఖానాపూర్ వరంగల్ జిల్లా,