21న సూర్యనారాయణ స్వామి తెప్పోత్సవం

అరసవల్లి, సూర్య : ప్రసిద్ధ పుణ్యక్షేత్రం అరసవల్లి శ్రీ సూర్యనారాయణ స్వామి వారి హంస నావికోత్సవాన్ని (తెప్పోత్సవం) ఈ నెల 21వ తేదీ శనివారం నిర్వహించనున్నారు. ఆలయం ఎదురుగా ఉన్న ఇంద్రపుష్కరిణిలో సాయంత్రం 4 గంటల నుంచి రాత్రి 7 గంటల వరకు ఈ వేడుకను అత్యంత వైభవంగా చేపట్టనున్నారు. తెప్పోత్సవం సందర్భంగా స్వామివారిని విశేషంగా అలంకరించి దేవేరులతో సహా సర్వాంగ సుందరంగా తీర్చిదిద్దిన హంసనావపై కొలువుదీర్చి పుష్కరిణిలో భక్తుల దర్శనార్థం ఊరేగిస్తారు. ఈ ఉత్సవ విశేషాలను ఆలయ ఉప కమిషనర్, కార్యనిర్వహణాధికారి కె.ఎన్.వి.డి.వి. ప్రసాద్ ఒక ప్రకటనలో వెల్లడించారు. భక్తులు పెద్ద సంఖ్యలో తరలివచ్చి స్వామివారి తెప్పోత్సవాన్ని తిలకించాలని కోరారు.