ఏఐకేఎస్ మహాసభలకు రైతులు తరలి రావాలి

బయ్యారం, మేజర్ న్యూస్, ఈ నెల 15 నుంచి 18వ తేదీ వరకు నల్లగొండలో నిర్వహించనున్న అఖిల భారత కిసాన్ సభ 36వ జాతీయ మహాసభలను జయప్రదం చేయాలని రైతు సంఘం నాయకులు పిలుపునిచ్చారు.ఇందులో భాగంగా బయ్యారం మండల కేంద్రంలోని సుందరయ్య స్తూపం వద్ద తెలంగాణ రైతు సంఘం 36 జెండాలను సీనియర్ కామ్రేడ్ మెరుగు వెంకన్న ఎగురవేశారు.
అనంతరం మంకెన తిరుపతిరావు అధ్యక్షతన జరిగిన సమావేశంలో సీపీఎం జిల్లా నాయకులు మండా రాజన్న,తెలంగాణ రైతు సంఘం జిల్లా అధ్యక్షుడు నంబూరు మధు మాట్లాడుతూ రైతాంగ హక్కుల సాధన వ్యవసాయ రంగ పరిరక్షణ కోసం ఏఐకేఎస్ నిరంతరం పోరాడుతోందన్నారు.కేంద్ర ప్రభుత్వం తీసుకొచ్చిన మూడు నల్ల వ్యవసాయ చట్టాలకు వ్యతిరేకంగా ఢిల్లీలో 13 నెలల పాటు సాగిన చారిత్రాత్మక రైతు ఉద్యమంలో కీలక పాత్ర పోషించిందని తెలిపారు. రైతులకు పంటలకు గిట్టుబాటు ధర కల్పించాలని,వ్యవసాయ రుణాలు మాఫీ చేసి కొత్త రుణాలు అందించాలని,కరువు ప్రాంతాల్లో పంట నష్టపరిహారం చెల్లించాలని డిమాండ్ చేశారు. సాదాబైనామా భూములకు పట్టాదారు పాస్ పుస్తకాలు ఇవ్వాలని,కౌలు రైతులను గుర్తించాలని కోరారు.ఈ నెల 15న నల్లగొండలో జరిగే భారీ బహిరంగ సభకు రైతులు అధిక సంఖ్యలో తరలివచ్చి మహాసభలను విజయవంతం చేయాలని పిలుపునిచ్చారు. కార్యక్రమంలో అంగిరేకుల నాగేశ్వరరావు,వల్లాల వెంకన్న,వెన్ను మోహన్,కత్తి రమేష్,నాగేష్,అప్పయ్య,యాకూబ్,ఖాసీం తదితరులు పాల్గొన్నారు.

రిపోర్టర్: స్వామి ,బయ్యారం, మహబూబాద్ జిల్లా