కొత్తగూడెం నుంచి సత్తుపల్లికి బదిలీలు నిలిపివేయాలి

కొత్తగూడెం సింగరేణి, సూర్య(మేజర్ న్యూస్)- కొత్తగూడెం ఏరియా నుండి సత్తుపల్లి ఏరియాకు క్లరికల్ సిబ్బంది మరియు అధికారుల బదిలీలను నిలిపివేయాలని ఐఎన్టీయూసీ నేతలు డిమాండ్ చేశారు.ఈ మేరకు కొత్తగూడెం ఏరియా ఐఎన్టీయూసీ వైస్ ప్రెసిడెంట్ ఎండి రజాక్, జీఎం కార్యాలయ ఐఎన్టీయూసీ ఫిట్ సెక్రటరీ సీహెచ్ సాగర్ శనివారం జీఎం (పర్సనల్) ఐఆర్ అండ్ పీఎం కిరణ్ కుమార్‌కు మెమోరాండం అందజేశారు.ఈ సందర్భంగా రజాక్ మాట్లాడుతూ, కొత్తగూడెం ఏరియాలో ఇప్పటికే తీవ్ర సిబ్బంది కొరత నెలకొని ఉందని తెలిపారు. వివిధ విభాగాలలో క్లరికల్ సిబ్బంది మరియు అధికారుల కొరత వల్ల ప్రస్తుతం ఉన్న సిబ్బందితోనే రోజువారీ పరిపాలనా విధులు, కార్యాలయ కార్యకలాపాలు నిర్వహించడం ఇబ్బందికరంగా మారిందన్నారు.
ఇటువంటి పరిస్థితుల్లో ఇక్కడ పనిచేస్తున్న సిబ్బందిని సత్తుపల్లి ఏరియాకు బదిలీ చేస్తే పరిపాలనా కార్యకలాపాలపై తీవ్ర ప్రభావం పడుతుందని, మిగిలిన సిబ్బందిపై అదనపు పనిభారం పడుతుందని ఆందోళన వ్యక్తం చేశారు. అందువల్ల ప్రతిపాదిత బదిలీలను పునఃపరిశీలించి నిలిపివేయాలని కోరారు.దీనికి జీఎం (పర్సనల్) సానుకూలంగా స్పందించి, ఈ అంశాన్ని పై అధికారుల దృష్టికి తీసుకెళ్లి బదిలీ ప్రక్రియను పునఃపరిశీలించేలా తన వంతు కృషి చేస్తానని హామీ ఇచ్చినట్లు నాయకులు తెలిపారు.