కార్తీక మాసంలో వైభవంగా సహస్ర లింగార్చన

ఇంద్రకీలాద్రి, మేజర్ న్యూస్ : పవిత్ర కార్తీక మాస ఉత్సవాలను పురస్కరించుకుని ఇంద్రకీలాద్రిపై దుర్గా మల్లేశ్వర స్వామివార్ల దేవస్థానంలోని మల్లేశ్వరస్వామి వారి ఆలయంలో శనివారం ప్రదోష కాలంలో ఆకాశదీపం, సహస్ర లింగార్చన, సహస్ర దీపాలంకరణ, ఊయల సేవ కార్యక్రమాలను అత్యంత వైభవంగా నిర్వహించారు. ఆలయ స్థానాచార్యులు శివప్రసాద్ శర్మ ఆధ్వర్యంలో వేద పండితులు, అర్చక బృందం వేద మంత్రోచ్ఛారణల నడుమ శాస్త్రోక్తంగా విశేష పూజలు నిర్వహించారు. కార్తీక మాసంలో సహస్ర లింగార్చనలో పాల్గొని పరమేశ్వరుడిని దర్శించుకోవడం వల్ల సమస్త పాపాలు, గ్రహదోషాలు తొలగిపోతాయని, వేయి లింగాలకు ఏకకాలంలో నిర్వహించే ఈ విశేష అర్చనతో భక్తులకు ఆయురారోగ్యాలు, అష్టైశ్వర్యాలు సిద్ధిస్తాయని అర్చకులు తెలిపారు. ఈ పూజా కార్యక్రమాల్లో దేవస్థానం ధర్మకర్తల మండలి చైర్మన్ బొర్రా రాధాకృష్ణ (గాంధీ), కార్యనిర్వహణాధికారి వి.కె. శీనా నాయక్ పాల్గొని స్వామివారికి ప్రత్యేక పూజలు సమర్పించారు. సహస్ర దీపాల కాంతుల నడుమ సాగిన అర్చన, అనంతరం నిర్వహించిన దుర్గా మల్లేశ్వర స్వామివార్ల ఊయల సేవ భక్తులను ఆకట్టుకున్నాయి. కార్యక్రమం అనంతరం భక్తులకు ప్రసాదాలు పంపిణీ చేశారు. ఈ కార్యక్రమంలో ధర్మకర్తల మండలి సభ్యులు రాఘవరాజు, ఎ. శ్రీనివాసరావు, సరిత, పద్మావతి ఠాకూర్, ప్రత్యేక ఆహ్వానితులు వి. శంకర బాబు తదితరులు పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.