స్వేచ్ఛాయుత ఎన్నికలే లక్ష్యం

పెనమలూరు, మేజర్ న్యూస్ : ఎన్నికలు ప్రశాంతంగా, పారదర్శకంగా నిర్వహించేందుకు ప్రతి ఒక్కరూ ఎన్నికల ప్రవర్తనా నియమావళిని తప్పనిసరిగా పాటించాలని కృష్ణా జిల్లా ఎస్పీ విద్యాసాగర్ నాయుడు స్పష్టం చేశారు. తాడిగడప, గుడివాడ మున్సిపాలిటీలతో పాటు మూడు విడతల్లో జరగనున్న గ్రామ పంచాయతీ ఎన్నికల నేపథ్యంలో పెనమలూరు పోలీస్ స్టేషన్‌లో నిర్వహించిన విలేకరుల సమావేశంలో ఎన్నికల నిబంధనలు, భద్రతా ఏర్పాట్లపై ఆయన వివరించారు. రాజకీయ పార్టీలు, అభ్యర్థులు ప్రచార ర్యాలీలు, బహిరంగ సభలు, సమావేశాలు నిర్వహించాలంటే ముందస్తుగా పోలీస్, రెవెన్యూ అధికారుల అనుమతులు పొందాలని సూచించారు. ప్రచారంలో ఇతర పార్టీలకు, అభ్యర్థులకు ఇబ్బందులు కలిగించడం, కుల, మత, ప్రాంతీయ విద్వేషాలు రెచ్చగొట్టే ప్రసంగాలు చేయడం, ఓటర్లకు డబ్బు, మద్యం, ఇతర వస్తువులతో ప్రలోభపెట్టడం వంటివి నిషేధమని తెలిపారు. ఇతరుల వ్యక్తిగత ప్రతిష్టకు భంగం కలిగించడం, ప్రత్యర్థి పార్టీల జెండాలు, పోస్టర్లు తొలగించడం, ధ్వంసం చేయడం వంటి చర్యలకు పాల్పడరాదన్నారు. లౌడ్‌స్పీకర్ల వినియోగానికి ముందస్తు అనుమతి తీసుకోవాలని, నిర్ణీత సమయ పరిమితులు పాటించాలని, అనుమతించిన కార్యక్రమాలకే వాటిని వినియోగించాలని స్పష్టం చేశారు. ఆస్పత్రులు, వైద్యశాలల పరిసరాల్లో శబ్ద కాలుష్యం లేకుండా జాగ్రత్తలు తీసుకోవాలని, అధిక శబ్దంతో నిబంధనలు ఉల్లంఘిస్తే చట్టప్రకారం చర్యలు తప్పవని హెచ్చరించారు. ఊరేగింపుల తేదీ, సమయం, ప్రారంభ, ముగింపు ప్రదేశాలను ముందుగానే నిర్ణయించి స్థానిక పోలీసుల అనుమతి పొందాలని, నామినేషన్ల దాఖలుకు అభ్యర్థులు ముగ్గురికి మించి రాకూడదని సూచించారు. రాష్ట్ర ఎన్నికల సంఘం జారీ చేసిన తాజా ఉత్తర్వులు, నిబంధనలను ప్రతి ఒక్కరూ అనుసరించాలని కోరారు. ఎన్నికల వేళ అవాంఛనీయ సంఘటనలకు తావులేకుండా పోలీస్ శాఖ పటిష్ట భద్రతా ఏర్పాట్లు చేపడుతోందని, సమస్యాత్మక ప్రాంతాలపై ప్రత్యేక నిఘా ఉంచడంతో పాటు నిబంధనల ఉల్లంఘనలపై నిరంతర పర్యవేక్షణ కొనసాగుతుందని తెలిపారు. ఎన్నికల నియమావళిని ఉల్లంఘించినా, అనుమతులు లేకుండా ప్రచార కార్యక్రమాలు నిర్వహించినా, శాంతిభద్రతలకు విఘాతం కలిగించినా కఠిన చర్యలు తీసుకుంటామని హెచ్చరించారు. ఓటర్లు ఎలాంటి భయాందోళనలకు గురికాకుండా స్వేచ్ఛగా తమ ఓటు హక్కును వినియోగించుకునేలా పోలీస్ శాఖ అన్ని చర్యలు తీసుకుంటుందని, ఎన్నికల ప్రశాంతతకు ప్రజలు సహకరించాలని ఎస్పీ కోరారు. సమావేశంలో డీఎస్పీ కడలి జయకృష్ణ, పెనమలూరు సీఐ ఎన్. వెంకట నారాయణ, ఎస్‌ఐలు, ఇతర పోలీస్ సిబ్బంది పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, పెనమలూరు నియోజకవర్గం, కృష్ణాజిల్లా.