నేడు పోస్టల్ బ్యాలెట్ పోలింగ్ ఉదయం 7 నుంచి సాయంత్రం 5 గంటల వరకు అవకాశం
బాడంగి, నవంబరు 22 (మేజర్ న్యూస్): రెండో సాధారణ పంచాయతీ ఎన్నికలకు సంబంధించి బాడంగి ఎంపీడీఓ కార్యాలయంలో ఏర్పాటు చేసిన ఫెసిలిటేషన్ కేంద్రంలో సోమవారం పోస్టల్ బ్యాలెట్ పోలింగ్ నిర్వహించనున్నట్లు ఎంపీడీఓ డివి శ్రీలత తెలిపారు. ఈ మేరకు ఆదివారం మాస్టర్ ట్రైనీలతో సమావేశం నిర్వహించి, పోలింగ్ నిర్వహణపై దిశానిర్దేశం చేశారు.
ఈ సందర్భంగా ఆమె మాట్లాడుతూ, ఎన్నికల విధులు నిర్వహిస్తున్న సిబ్బంది సంబంధిత గ్రామ పంచాయతీల్లో ఓటర్లుగా నమోదై ఉంటే పోస్టల్ బ్యాలెట్ సౌకర్యాన్ని వినియోగించుకోవాలని సూచించారు. పోస్టల్ బ్యాలెట్ కోసం దరఖాస్తుతో పాటు ఎన్నికల విధుల ఉత్తర్వు, గుర్తింపు పత్రం నకళ్లను ఫెసిలిటేషన్ కేంద్రంలో సమర్పించాలన్నారు.
దరఖాస్తులో గ్రామ పంచాయతీ పేరు, వార్డు నంబరు, ఓటరు జాబితాలోని ఓటరు వరుస సంఖ్యను తప్పనిసరిగా నమోదు చేయాలని స్పష్టం చేశారు. సోమవారం ఉదయం 7 గంటల నుంచి సాయంత్రం 5 గంటల వరకు ఫెసిలిటేషన్ కేంద్రంలో పోస్టల్ బ్యాలెట్ ద్వారా ఓటు హక్కు వినియోగించుకోవచ్చని ఎంపీడీఓ తెలిపారు.