మానవత్వాన్ని చాటుకున్న సీతానగరం పోలీసులు ఎస్‌ఐ ఎం. హేమలత ఆధ్వర్యంలో గుర్తుతెలియని మృతదేహానికి అంత్యక్రియలు
సీతానగరం, అక్టోబరు 25 (మేజర్ న్యూస్):
మానవత్వమే నిజమైన పోలీసు సేవకు నిదర్శనమని సీతానగరం పోలీసులు మరోసారి చాటుకున్నారు. కాసయ్యపేట, అంటిపేట గ్రామాల మధ్య గుర్తుతెలియని ఓ వ్యక్తి మృతదేహం పడి ఉందన్న సమాచారం అందడంతో ఎస్‌ఐ ఎం. హేమలత ఆధ్వర్యంలో పోలీసు సిబ్బంది తక్షణమే స్పందించారు.
పోలీసు సిబ్బంది హెచ్‌సీ తిరుపతి, పీసీ ఈశ్వర్, అప్పలకొండ ఘటనా స్థలానికి చేరుకుని మృతదేహాన్ని పరిశీలించారు. అనంతరం పంచాయతీ కార్యదర్శి, వీఆర్వో, వీఆర్ఏ సమక్షంలో మృతుడు యాచకుడిగా గుర్తించి, మృతదేహానికి గౌరవప్రదంగా అంత్యక్రియలు నిర్వహించారు.
కుటుంబ సభ్యులు, ఆత్మీయులు లేని అనాథ మృతదేహానికి కూడా గౌరవప్రదమైన వీడ్కోలు పలకడం ద్వారా సీతానగరం పోలీసులు మానవత్వాన్ని చాటుకున్నారు. విధి నిర్వహణతో పాటు సామాజిక బాధ్యతను గుర్తించి స్పందించిన ఎస్‌ఐ ఎం. హేమలత, పోలీసు సిబ్బంది సేవాభావం అభినందనీయమని పలువురు ప్రశంసించారు.
పి సతీష్ కుమార్ స్టాప్ రిపోర్టర్ పార్వతీపురం మన్యం జిల్లా
