నాలాల విస్తరణ పనులు వేగవంతం చేయాలి రూ.79.58 కోట్లతో శేరిలింగంపల్లిలో నాలాల విస్తరణ పనులు.. ఎమ్మెల్యే అరెకపూడి గాంధీ

శేరిలింగంపల్లి,మేజర్ న్యూస్ : నియోజకవర్గంలో వరద ముంపు సమస్యకు శాశ్వత పరిష్కారం చూపే దిశగా నాలాల విస్తరణ పనులు చేపడుతున్నట్లు ఎమ్మెల్యే  గాంధీ తెలిపారు. ఎస్‌ఎన్‌డీపీ ఫేజ్‌-2లో భాగంగా శేరిలింగంపల్లి నియోజకవర్గంలో రూ.79.58 కోట్ల అంచనా వ్యయంతో నాలాల విస్తరణ పనులు కొనసాగుతున్నాయని పేర్కొన్నారు. గచ్చిబౌలి డివిజన్ పరిధిలోని నల్లగండ్ల చెరువు అలుగు నుంచి తారానగర్ వరకు రూ.24 కోట్లతో చేపడుతున్న నాలా విస్తరణ, ఆర్‌సీసీ బాక్స్ డ్రైన్ నిర్మాణ పనులను ఎమ్మెల్యే  గాంధీ పరిశీలించారు. ఈ సందర్బంగా ఆయన మాట్లాడుతూ  ఆర్‌సీసీ బెడ్, సైడ్‌వాల్స్ నిర్మాణ పనుల పురోగతిని సమీక్షించారు. అసంపూర్తిగా ఉన్న పనులు యుద్ధ ప్రాతిపదికన పూర్తి చేసి ప్రజలకు అందుబాటులోకి తీసుకురావాలని అధికారులను ఆదేశించారు.వర్షాకాలంలో లోతట్టు ప్రాంతాలు ముంపునకు గురికాకుండా ముందస్తు చర్యలు చేపట్టాలని సూచించారు. నాలల నిర్మాణంలో నాణ్యత ప్రమాణాలు పాటించాలని, నీటి ప్రవాహానికి ఆటంకాలు లేకుండా సరైన లెవల్స్‌తో పనులు చేపట్టాలని స్పష్టం చేశారు. ప్రధాన రహదారులపై పనులు జరిగే సమయంలో ట్రాఫిక్ ఇబ్బందులు తలెత్తకుండా ప్రత్యామ్నాయ మార్గాలు చూపాలని, ప్రజలకు అసౌకర్యం కలగకుండా చూడాలని అధికారులకు సూచించారు. పనుల్లో జాప్యం చేయకుండా త్వరితగతిన పూర్తి చేసి, భవిష్యత్తులో వరద ముంపు సమస్య పునరావృతం కాకుండా చర్యలు తీసుకోవాలని ఎమ్మెల్యే  గాంధీ పేర్కొన్నారు.