అంబాజీపేటలో శ్రీ విజయ భేతాళస్వామి వాహన మహోత్సవం..

                               శోభాయాత్రలో 14 పాలేల దేవతామూర్తుల ఊరేగింపు, పోటెత్తిన భక్తజనం!
సూర్య డిస్ట్రిక్ట్ & కల్చరల్ బ్యూరో,H ,అంబాజీపేట/కోనసీమ: డాక్టర్ బి.ఆర్. అంబేద్కర్ కోనసీమ జిల్లా అంబాజీపేటలో ఆదివారం రాత్రి శ్రీ విజయ భేతాళస్వామి వాహన మహోత్సవం మరియు తీర్థం అత్యంత వైభవంగా, నేత్రపర్వంగా సాగాయి. అంబాజీపేట-మాచవరం శ్రీ శెట్టిబలిజ అభ్యుదయ సంక్షేమ సంఘం ఆధ్వర్యంలో నిర్వహించిన ఈ సంబరాలు ఆదివారం రాత్రి ప్రారంభమై సోమవారం తెల్లవారుజాము వరకు అప్రతిహతంగా కొనసాగాయి.

విద్యుత్ కాంతుల్లో శోభాయాత్ర – విశేష సాంస్కృతిక ప్రదర్శనలు:
ఉత్సవాల్లో భాగంగా 14 పాలెంలకు చెందిన 15 రకాల దేవతామూర్తుల వాహనాలను విద్యుత్ దీపాలు, పచ్చిపూలతో కనులవిందుగా అలంకరించి పురవీధుల్లో శోభాయాత్ర నిర్వహించారు. మేళతాళాలు, డప్పు వాయిద్యాల హోరు నడుమ ఊరేగిన ఈ రథాలు శ్రీనివాసనగర్‌లోని శ్రీ విజయ భేతాళస్వామి ఆలయానికి చేరుకున్నాయి. గరగ నృత్యాలు, కొబ్రా మరియు శక్తి వేషధారణలు భక్తులను విశేషంగా ఆకట్టుకున్నాయి. చేడీ తాళింభానా, కత్తి యుద్ధాలు, అగ్గి బరాటాలతో యువకులు ప్రదర్శించిన సాహస విన్యాసాలు ప్రేక్షకులను గగుర్పాటుకు గురిచేశాయి. ప్రధాన సెంటర్లలో భారీగా బాణాసంచా కాల్చడంతో పాటు నాలుగు రోడ్ల కూడలిలో ఏర్పాటు చేసిన సాంస్కృతిక వేదికల వద్ద మహిళలు, భక్తులు వేలాదిగా తరలివచ్చారు.

14 పాలెంల నుంచి కొలువుదీరిన వాహనమూర్తులు:
ఈ ఉత్సవాల్లో శ్రీనివాసనగర్, పెచ్చెట్టివారిపాలెం నుంచి గరుత్మంతుడు, మాచవరం శ్రీరామ్ నగర్ నుంచి సింహ వాహనం, దొమ్మేటివారిపాలెం నుంచి శ్రీకృష్ణుడు, స్త్రీల ఆస్పత్రి దొమ్మేటివారిపాలెం మరియు పోతాయిలంకల నుంచి శ్రీఆంజనేయస్వామి వాహనాలు కొలువుదీరాయి. అలాగే గంగలకుర్రు మలుపు నుంచి శ్రీ విజయ గణపతి, మాచవరం ఇటికాలమ్మ గుడి మరియు కొత్తపాలెంల నుంచి హంస వాహనాలు, చప్పిడివారిపాలెం నుంచి శ్రీ షిరిడిసాయిబాబా, గుత్తులవారిపాలెం నుంచి సింహ వాహనం, నందంపూడి నుంచి శ్రీ రాజరాజేశ్వరిదేవి, శ్రీనివాసనగర్ నుంచి ఏనుగు వాహనం, మాచవరం డామ్ సెంటర్ నుంచి వీరాంజనేయస్వామి, పెచ్చెట్టివారిపాలెం నుంచి లక్ష్మి గణపతి వాహనాలు భక్తులకు దర్శనమిచ్చాయి.

పటిష్ఠ పోలీసు బందోబస్తు – ప్రముఖుల దర్శనం:
ఉత్సవాల్లో ఎలాంటి అవాంఛనీయ ఘటనలు జరగకుండా కొత్తపేట డీఎస్పీ సుంకర మురళీమోహన్, పి.గన్నవరం సీఐ రుద్రరాజు భీమరాజు పర్యవేక్షణలో ఎస్ఐ షేక్ సుభాని ఆధ్వర్యంలో పటిష్ఠ పోలీసు బందోబస్తు ఏర్పాటు చేశారు. శెట్టిబలిజ అభ్యుదయ సంక్షేమ సంఘం అధ్యక్ష, కార్యదర్శులు దొమ్మేటి వెంకట రామారావు, మట్టపర్తి రాము, ఉత్సవ కమిటీ చైర్మన్ శీలమ్ సత్య అర్జున మోహనరావు తదితరులు ఏర్పాట్లను సమన్వయం చేశారు. కోనసీమ పరిసర ప్రాంతాల భక్తులతో పాటు పలు రాజకీయ పార్టీల ప్రజాప్రతినిధులు స్వామివారిని దర్శించుకుని ప్రత్యేక పూజలు నిర్వహించారు.