గంజాయి రవాణా చేస్తున్న మహారాష్ట్ర పోలీస్ కానిస్టేబుల్-ఆరు లక్షల విలువైన 12 కిలోల గంజాయి పట్టివేత

నెక్కొండ, మేజర్ న్యూస్, గంజాయి అక్రమ రవాణాకు పాల్పడుతున్న మహారాష్ట్రకు చెందిన ఓ పోలీసు కానిస్టేబుల్‌ను నెక్కొండ పోలీసులు ఆదివారం పట్టుకున్నారు. అతని వద్ద నుంచి 12 కిలోల ఎండు గంజాయితోపాటు మూడు సెల్‌ఫోన్లను స్వాధీనం చేసుకున్నారు. పట్టుబడిన గంజాయి విలువ సుమారు రూ.6 లక్షలు ఉంటుందని పోలీసులు తెలిపారు.నెక్కొండ ఎస్సై జలగం శ్రావణ్‌కుమార్‌ తన సిబ్బందితో కలిసి ఆదివారం స్థానిక బస్టాండ్‌ సమీపంలో పెట్రోలింగ్‌ నిర్వహిస్తుండగా, ఓ వ్యక్తి అనుమానాస్పదంగా కనిపించాడు. పోలీసులను చూసి పారిపోయేందుకు ప్రయత్నించడంతో అప్రమత్తమైన సిబ్బంది అతడిని పట్టుకుని తనిఖీ చేశారు. ఈ క్రమంలో అతని వద్ద 12 కిలోల ఎండు గంజాయి లభించడంతోపాటు మూడు సెల్‌ఫోన్లను స్వాధీనం చేసుకున్నారు.
గంజాయి అక్రమ రవాణాలో కానిస్టేబులే ప్రధాన సూత్రధారి కావడం గమనార్హం.
పోలీసుల విచారణలో నిందితుడు మహారాష్ట్రకు చెందిన నితిన్‌ న్యాను షిండేగా గుర్తించారు. అతను మహారాష్ట్ర పోలీసు శాఖలో కానిస్టేబుల్‌గా పనిచేస్తున్నట్లు పోలీసులు వెల్లడించారు. ఒడిశా రాష్ట్రం నుంచి గంజాయిని కొనుగోలు చేసి, మహారాష్ట్రలో అధిక ధరకు విక్రయించేందుకు తరలిస్తున్న క్రమంలో నెక్కొండలో పట్టుబడినట్లు తెలిపారు. ఈ వ్యవహారంలో అతడే కీలక పాత్ర పోషిస్తున్నట్లు ప్రాథమికంగా వెల్లడైంది.ఈ ఘటనపై పోలీసులు కేసు నమోదు చేసి దర్యాప్తు చేపట్టారు. గంజాయి సరఫరా వెనుక ఇంకా ఎవరైనా ఉన్నారా? ఈ అక్రమ రవాణా వ్యవహారంలో ఇతరుల ప్రమేయం ఎంతవరకు ఉంది? అనే కోణాల్లో విచారణ కొనసాగిస్తున్నారు.

రిపోర్టర్; శ్రావణి, నెక్కొండ ,వరంగల్ జిల్లా