పాపిరెడ్డి కాలనీ రైల్వే అండర్పాస్ వద్ద వర్షపు నీటి సమస్యకు శాశ్వత పరిష్కారం : ఎమ్మెల్యే గాంధీ
హఫీజ్ పెట్,మేజర్ న్యూస్ : శేరిలింగంపల్లి డివిజన్‌ పరిధిలోని పాపిరెడ్డి కాలనీ రైల్వే అండర్పాస్ వద్ద వర్షాకాలంలో తరచూ ఏర్పడుతున్న నీటి నిల్వ సమస్యకు శాశ్వత పరిష్కారం కల్పించే దిశగా చర్యలు చేపట్టినట్లు ఎమ్మెల్యే గాంధీ పేర్కొన్నారు.రూ.98 లక్షల వ్యయంతో 2.25 లక్షల లీటర్ల సామర్థ్యంతో నిర్మిస్తున్న వర్షపు నీటి నిల్వ సంపు పనులను ఆదివారం ఎమ్మెల్యే ఆరెకపూడి గాంధీ పరిశీలించారు.ఈ సందర్భంగా ఆయన మాట్లాడుతూ.. ప్రతి వర్షాకాలంలో అండర్పాస్ వద్ద నీరు నిలిచిపోవడంతో ప్రజలు, వాహనదారులు, పాదచారులు తీవ్ర ఇబ్బందులు ఎదుర్కొంటున్నారని తెలిపారు.
ఈ సమస్యకు శాశ్వత పరిష్కారం చూపించాలనే ఉద్దేశంతో నీటి నిల్వ సంపు నిర్మాణం చేపట్టినట్లు పేర్కొన్నారు. నిర్మాణం పూర్తయి అందుబాటులోకి వస్తే నీటి నిల్వ సమస్య తగ్గడంతో పాటు పాపిరెడ్డి కాలనీ, హుడా కాలనీల మధ్య రాకపోకలు సులభతరం అవుతాయని చెప్పారు.ప్రయాణికులు, వాహనదారులకు ఇబ్బందులు తగ్గి ప్రయాణ సమయం, ఇంధనం ఆదా అయ్యే అవకాశం ఉందన్నారు. నిర్మాణ పనులను వేగవంతం చేసి త్వరితగతిన పూర్తి చేయాలని అధికారులను ఆదేశించారు. పనుల్లో నాణ్యతా ప్రమాణాలు తప్పనిసరిగా పాటించాలని, నాణ్యత విషయంలో ఎక్కడా రాజీ పడవద్దని స్పష్టం చేశారు. ప్రజలకు శాశ్వత ప్రయోజనం చేకూరేలా పనులు పూర్తి చేయాలని సూచించారు.
