ఓటు హక్కు పరిరక్షణకు కాంగ్రెస్ సమరశంఖం :కరీంనగర్‌లో ‘ఓట్ బచావో – దేశ్ బచావో’ సమావేశం.. పాల్గొన్న కూన శ్రీశైలం గౌడ్
జీడిమెట్ల మేజర్ న్యూస్ : దేశంలో ప్రజాస్వామ్య పరిరక్షణకు, ఓటు హక్కు సంరక్షణకు ప్రజల్లో విస్తృత అవగాహన కల్పించాలని కాంగ్రెస్ పార్టీ పిలుపునిచ్చింది. ఏఐసీసీ ఆదేశాల మేరకు దేశవ్యాప్తంగా చేపట్టిన ‘ఓట్ బచావో – దేశ్ బచావో’ కార్యక్రమంలో భాగంగా కరీంనగర్ జిల్లా కాంగ్రెస్ పార్టీ కార్యాలయంలో ఆదివారం నిర్వహించిన సమావేశంలో కుత్బుల్లాపూర్ మాజీ ఎమ్మెల్యే, కరీంనగర్ పార్లమెంట్ కోఆర్డినేటర్ కూన శ్రీశైలం గౌడ్ పాల్గొన్నారు. ఏఐసీసీ పరిశీలకులు ఎస్. శరత్‌తో కలిసి ఆయన సమావేశంలో పాల్గొని పార్టీ నాయకులతో చర్చించారు. టీపీసీసీ అధ్యక్షుడు బొమ్మ మహేష్ కుమార్ గౌడ్, ఏఐసీసీ కార్యదర్శి సచిన్ సావంత్ సూచనల మేరకు నిర్వహించిన ఈ సమావేశంలో ఓటు హక్కు పరిరక్షణ, ఓటర్లలో అవగాహన పెంపొందించడం, ప్రజాస్వామ్య విలువలను కాపాడేందుకు చేపట్టాల్సిన చర్యలపై చర్చించారు.
అలాగే నవంబర్ 1న ఢిల్లీలోని రామ్‌లీలా మైదానంలో నిర్వహించనున్న నిరసన కార్యక్రమానికి పార్టీ శ్రేణులను పెద్ద సంఖ్యలో సమీకరించడం, కార్యక్రమ విజయవంతానికి అనుసరించాల్సిన వ్యూహాలు, భవిష్యత్ కార్యాచరణపై నాయకులు సమాలోచనలు జరిపారు. ఓటు హక్కు ప్రజాస్వామ్యంలో అత్యంత కీలకమైనదని, దాని పరిరక్షణ కోసం పార్టీ శ్రేణులు క్షేత్రస్థాయిలో ప్రజలకు అవగాహన కల్పించాలని సమావేశంలో నేతలు సూచించారు. కాంగ్రెస్ పార్టీ చేపట్టిన కార్యక్రమాన్ని ప్రజల్లోకి విస్తృతంగా తీసుకెళ్లేందుకు నాయకులు, కార్యకర్తలు సమన్వయంతో పనిచేయాలని పిలుపునిచ్చారు.
ఈ సమావేశంలో జిల్లా కాంగ్రెస్ అధ్యక్షుడు, ఎమ్మెల్యే మేడిపల్లి సత్యం, మనకొండూరు ఎమ్మెల్యే కవ్వంపల్లి సత్యనారాయణ, మున్నూరుకాపు కార్పొరేషన్ చైర్మన్ బొమ్మ శ్రీరామ్ చక్రవర్తి, జిల్లా గ్రంథాలయ సంస్థ చైర్మన్ సత్తు మల్లేశం, కార్పొరేషన్ అధ్యక్షుడు వైద్యుల అంజన్ కుమార్, హుజూరాబాద్ నియోజకవర్గ ఇన్‌చార్జి ఒడితల ప్రణవ్ బాబు, కోమటిరెడ్డి నరేందర్ రెడ్డి, పురుమల్ల శ్రీనివాస్, ఆల్‌ఫోర్స్ నరేందర్ రెడ్డి తదితర కాంగ్రెస్ నాయకులు పాల్గొన్నారు.
