2026లో అధికార పార్టీ ఒత్తిళ్లను ఎదుర్కొని వైసీపీ వీరోచిత పోరు...

సర్వేపల్లి ,  మేజర్ న్యూస్ :   రాజకీయాల్లో అధికారం శాశ్వతం కాదు.. ప్రజల కోసం పోరాడే నాయకత్వం, కార్యకర్తల పట్టుదలే రాజకీయ పార్టీల అసలైన బలమని నెల్లూరు జిల్లా సర్వేపల్లి నియోజకవర్గంలో ఇటీవల జరిగిన స్థానిక సంస్థల ఎన్నికల ఫలితాలు మరోసారి నిరూపించాయని వైఎస్సార్ కాంగ్రెస్ పార్టీ శ్రేణులు పేర్కొంటున్నాయి. 2021లో జరిగిన స్థానిక సంస్థల ఎన్నికలకు, 2026లో జరిగిన ఎన్నికలకు మధ్య స్పష్టమైన రాజకీయ వ్యత్యాసం కనిపిస్తోందని రాజకీయ పరిశీలకులు విశ్లేషిస్తున్నారు.
2021లో ఓటమి భయంతో టీడీపీ వెనుకడుగు..
         2021లో జరిగిన స్థానిక సంస్థల ఎన్నికల సమయంలో తెలుగుదేశం పార్టీకి ఓటమి భయం పట్టుకోవడంతో ఎన్నికల బరిలో నిలవడానికి వెనుకంజ వేసిందని వైసీపీ నాయకులు విమర్శిస్తున్నారు. అప్పటి రాజకీయ పరిస్థితుల్లో అధికార వైఎస్సార్సీపీని ఎదుర్కొనే ధైర్యం లేక టీడీపీ శ్రేణులు పలాయనం చిత్తగించాయని, అనేక ప్రాంతాల్లో పోటీకి దూరంగా ఉండిపోయాయని ఆరోపిస్తున్నారు.ఎన్నికలంటేనే వెనకడుగు వేసే పరిస్థితి అప్పట్లో టీడీపీలో కనిపించిందని గుర్తుచేస్తున్నారు.
2026లో అధికార పార్టీకి ఎదురొడ్డి వైసీపీ పోరాటం..
              అయితే 2026లో జరిగిన స్థానిక సంస్థల ఎన్నికల్లో పరిస్థితులు పూర్తిగా భిన్నంగా కనిపించాయి. రాష్ట్రంలో అధికారంలో ఉన్న కూటమి ప్రభుత్వం అండదండలు, రాజకీయ బలం, అధికార యంత్రాంగం అందుబాటులో ఉన్నప్పటికీ, వైఎస్సార్సీపీ నాయకులు, కార్యకర్తలు మాత్రం ఎక్కడా వెనుకడుగు వేయలేదని పార్టీ శ్రేణులు చెబుతున్నాయి.ఎన్నికల సమయంలో అధికార పార్టీ నుంచి దౌర్జన్యాలు, బెదిరింపులు, అక్రమ కేసులు, అధికార దుర్వినియోగం వంటి పరిణామాలు ఎదురయ్యాయని వైసీపీ నేతలు ఆరోపించారు.అయినప్పటికీ ఒత్తిళ్లకు తలొగ్గకుండా, ప్రలోభాలకు లొంగకుండా పార్టీ అభ్యర్థుల తరఫున నాయకులు, కార్యకర్తలు క్షేత్రస్థాయిలో పోరాటం కొనసాగించారని పేర్కొంటున్నారు. ప్రతికూల పరిస్థితుల్లోనూ ఎన్నికల బరిలో నిలిచి ప్రజల మద్దతును కూడగట్టడం ద్వారా తమ రాజకీయ సత్తాను చాటుకున్నామని వైసీపీ శ్రేణులు ధీమా వ్యక్తం చేస్తున్నాయి.
సర్వేపల్లిలో మూడో వంతు స్థానాలు వైసీపీ ఖాతాలోకి..
            సర్వేపల్లి నియోజకవర్గంలో వెలువడిన స్థానిక సంస్థల ఎన్నికల ఫలితాలు వైఎస్సార్సీపీకి రాజకీయంగా ఉత్సాహాన్నిచ్చాయి. వైసీపీ మూడో వంతు స్థానాలను సాధించడం సాధారణ విషయం కాదని పార్టీ నాయకులు అభిప్రాయపడుతున్నారుముఖ్యంగా అధికారంలో లేకపోయినా గ్రామస్థాయిలో పార్టీకి ఉన్న బలాన్ని, కార్యకర్తల సమష్టి కృషిని ఈ ఫలితాలు ప్రతిబింబిస్తున్నాయని విశ్లేషిస్తున్నారు.
గత ఎన్నికలతో పోలిస్తే తెలుగుదేశం పార్టీ ఓటు శాతం గణనీయంగా తగ్గడం, వైఎస్సార్సీపీ ఓటు శాతం పెరగడం రాజకీయంగా ప్రాధాన్యత సంతరించుకుంది. ఈ పరిణామం రాబోయే రాజకీయ సమీకరణాలపై ప్రభావం చూపే అవకాశం ఉందని రాజకీయ వర్గాల్లో చర్చ జరుగుతోంది.
అధికారం అండగా లేకున్నా.. కార్యకర్తలే అసలైన బలం
           సాధారణంగా అధికారంలో ఉన్న పార్టీకి ఎన్నికల సమయంలో రాజకీయంగా అనేక అనుకూలతలు ఉంటాయి. ప్రభుత్వ యంత్రాంగం, అధికార బలం, రాజకీయ వనరులు అందుబాటులో ఉంటాయి. కానీ ప్రతిపక్షంలో ఉన్న పార్టీకి కార్యకర్తల అంకితభావం, నాయకత్వంపై నమ్మకం, ప్రజల ఆదరణే ప్రధాన బలంగా నిలుస్తాయి. ఈ నేపథ్యంలో 2026 ఎన్నికల్లో వైసీపీ శ్రేణులు ప్రదర్శించిన పోరాట పటిమ పార్టీ భవిష్యత్ రాజకీయాలకు కీలక సంకేతంగా మారిందని రాజకీయ పరిశీలకులు అభిప్రాయపడుతున్నారు.
పోరాటమే మా బలం.. వెనుకడుగు వేయడం మా నైజం కాదు
          2021లో అధికారంలో ఉండి ఎన్నికలను ఎదుర్కొన్న వైసీపీకి, 2026లో ప్రతిపక్షంలో ఉండి ఎన్నికల బరిలో నిలిచిన వైసీపీకి మధ్య పరిస్థితులు భిన్నమైనప్పటికీ, పార్టీ శ్రేణులు తమ పోరాట స్ఫూర్తిని కొనసాగించాయని అభిమానులు పేర్కొంటున్నారు. అధికారం ఉన్నప్పుడే రాజకీయాలు చేయడం కాదు.. అధికారం కోల్పోయినప్పుడు కూడా ప్రజల మధ్య ఉంటూ పోరాటం చేయడమే నిజమైన రాజకీయ నాయకత్వ లక్షణమని ఈ ఎన్నికలు చాటిచెప్పాయని అంటున్నారు. సర్వేపల్లి నియోజకవర్గంలో జరిగిన స్థానిక సంస్థల ఎన్నికలు కేవలం గెలుపోటములకే పరిమితం కాకుండా, రెండు ప్రధాన రాజకీయ పార్టీల బలాబలాలను అంచనా వేసే వేదికగా నిలిచాయి. ప్రతికూల పరిస్థితుల్లోనూ వైఎస్సార్సీపీ సాధించిన ఫలితాలు పార్టీ శ్రేణుల్లో కొత్త ఉత్సాహాన్ని నింపాయి. గత ఎన్నికలతో పోలిస్తే ఓటు శాతాల్లో వచ్చిన మార్పులు రాబోయే రాజకీయ పోరుకు ఆసక్తికర సంకేతాలుగా మారాయి.అధికారం ఉన్నా, లేకున్నా ప్రజాక్షేత్రంలో పోరాటమే తమ మార్గమని వైఎస్సార్సీపీ నాయకులు, కార్యకర్తలు ఈ ఎన్నికల ద్వారా చాటి చెప్పారు.