ఫీజు రీయింబర్స్‌మెంట్‌ బకాయిలు వెంటనే చెల్లించండి..
తాడేపల్లి: రాష్ట్రంలో ఫీజు రీయింబర్స్‌మెంట్‌ పథకాన్ని ప్రభుత్వం నిర్వీర్యం చేస్తోందంటూ వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి విమర్శించారు. ముఖ్యమంత్రి నారా చంద్రబాబు నాయుడు, విద్యాశాఖ మంత్రి నారా లోకేష్‌లను ఉద్దేశించి ఆయన సోషల్ మీడియా వేదిక ‘ఎక్స్‌’ (X) ద్వారా పలు ప్రశ్నలు సంధించారు.
ఫీజు రీయింబర్స్‌మెంట్‌ పెండింగ్‌ బకాయిలను ప్రభుత్వం వెంటనే విడుదల చేయాలని వైఎస్‌ జగన్‌ తన పోస్టులో డిమాండ్ చేశారు. సకాలంలో ఫీజులు చెల్లించకపోవడం వల్ల విద్యార్థులు తీవ్ర ఇబ్బందులు ఎదుర్కొంటున్నారని ఆయన ఆందోళన వ్యక్తం చేశారు.
ఈ సందర్భంగా చిత్తూరులో ఓ విద్యార్థిని ఆత్మహత్యాయత్నం చేసిన ఘటనను ప్రస్తావిస్తూ.. ఆ పరిస్థితికి ప్రభుత్వ వైఫల్యమే కారణం కాదా? అంటూ వైఎస్‌ జగన్‌ సూటిగా ప్రశ్నించారు. విద్యార్థుల భవిష్యత్తుతో ఆడుకోవద్దని, తక్షణమే పెండింగ్‌ నిధులను విడుదల చేసి విద్యార్థులకు అండగా నిలవాలని ఆయన ప్రభుత్వాన్ని కోరారు.
