వరి వద్దు ఆరుతడి పంటలే మేలు ఎంపీడీవో చిన్నారెడ్డి
చేగుంట;ఎల్ నీనో ప్రభావంతో భవిష్యత్తులో సాగు నీటి సమస్యలు అధికంగా తలెత్తే అవకాశం ఉన్నందున రైతులు వారికి బదులు ఆరుతడి పంటలను పండించడం మేలని చేగుంట మండల ప్రజా పరిషత్ అధికారి చిన్నారెడ్డి అన్నారు. శుక్రవారం చేగుంట మండలంలోని ఇబ్రహీంపూర్, కరీంనగర్ గ్రామాలలో జరిగిన సమావేశాలలో ఆయన ప్రజలనుదేశించి మాట్లాడుతూ వర్షాలు కురువకపోవడం వల్ల అనేక చెరువులు, కుంటలలోనీరు తగినంతగా రాలేదని అన్నారు. రాబోయే కాలంలో సాగు, తాగునీటి సమస్యలు అధికమయ్యే అవకాశం ఉన్నందున ప్రజలు నీటిని పొదుపుగా వాడాలని సూచించారు. ముఖ్యంగా రైతులు అధిక నీరు అవసరమయ్యే వరి పంటలను వేసి నష్టపోవద్దని సూచించారు. ఆరుతడి పంటలైన జొన్న, మొక్కజొన్న,సజ్జ,కంది, పెసర,మినుము,పొద్దు తిరుగుడు, కూరగాయలు వంటి పంటలను పండించి లాభపడాలని ఆయన కోరారు. నీటి వనరులను పొదుపుగా వినియోగించుకోవాల్సిన అవసరం ఉందన్నారు. నీటిని పొదుపు చేసుకునే అలవాటును ప్రజలు అలవర్చుకోవాలన్నారు. వర్షపు నీటిని, మనం వినియోగించిన తర్వాత వచ్చే వృధా నీటిని భూమిలోకి ఇంకెలా ఇంకుడు గుంతల నిర్మాణం చేపట్టాలని సూచించారు. ప్రభుత్వం, అధికారులు మాత్రమే నీటిని పొదుపు చేయలేరని,ప్రజల భాగస్వామ్యం ఉంటేనే ఎక్కువ మట్టుకు నీటిని వృధా కాకుండా చూడవచ్చు అన్నారు. ప్రభుత్వం ప్రత్యేకంగా గ్రామసభల ద్వారా ఎల్నీనో ప్రభావం వల్ల ఎదురయ్యే నీటి సమస్యలను ప్రజలకు తెలియజేపాలని ప్రయత్నిస్తోందన్నారు. గ్రామాలలోని ప్రజాప్రతినిధులు,యువకులు రాబోయే కాలంలో ఎదురయ్యే నీటి సమస్యలపై ప్రజలకు అవగాహన కల్పించాలన్నారు.ఈ కార్యక్రమంలో ఆయా గ్రామాల సర్పంచులు, అధిరులు ప్రజలు పాల్గొన్నారు.
