దివ్యాంగలకు శాప్ స్పోర్ట్స్ పాలసీలో గుర్తింపు ఇవ్వాలి

ఎడ్యుకేషన్ స్టాఫ్ రిపోర్టర్ : దివ్యాంగ క్రికెట్ క్రీడాకారులకు మరింత గుర్తింపు, ప్రోత్సాహం కల్పించాలని ఆంధ్ర క్రికెట్ అసోసియేషన్ డిఫరెంట్లీ ఏబుల్డ్ క్రికెట్ కమిటీ సభ్యుడు యడ్లపల్లి సూర్యనారాయణ, సౌత్ ఇండియా కోఆర్డినేటర్ మధుసూదన్ నాయక్ కోరారు. ఈ మేరకు శుక్రవారం విజయవాడలోని శాప్ కార్యాలయంలో వైస్ చైర్మన్ & మేనేజింగ్ డైరెక్టర్ భరణిను  మర్యాదపూర్వకంగా కలసి వినతి అందజేసి విజ్ఞప్తి చేశారు. సూర్యనారాయణ మాట్లాడుతూ కూటమి ప్రభుత్వంలో దివ్యాంగుల క్రీడలకు గుర్తింపు పెరుగుతున్న నేపథ్యంలో దివ్యాంగ క్రికెట్ క్రీడాకారులకు సమాన అవకాశాలు కల్పించాలన్నారు. ప్రస్తుతం శాప్ పారాఒలింపిక్స్ స్పోర్ట్స్ పాలసీలో రెండో కేటగిరీలో ఉన్న దివ్యాంగ క్రికెట్ ను మొదటి కేటగిరీలోకి చేర్చాలని కోరారు. దీనివల్ల ప్రభుత్వ ప్రోత్సాహకాలు, ఆర్థిక సహాయం, శిక్షణ వంటి అవకాశాలు మెరుగవుతాయని వివరించారు. దీనిపై సానుకూలమైన స్పందించిన ఆమె దివ్యాంగ క్రికెట్ క్రీడాకారులకు 3 శాతం స్పోర్ట్స్ పాలసీ ద్వారా ప్రయోజనాలు అందేలా చైర్మన్ రవినాయుడుతో చర్చించి చర్యలు తీసుకుంటామని హామీ ఇచ్చారు. ఏసిఏసహకారంతో డిసిసి ఏపీ రాష్ట్రంలో ఫిజికల్ డిజెబిలిటీ క్రికెట్, బ్లైండ్ క్రికెట్, వీల్ చైర్ క్రికెట్, డెఫ్ క్రికెట్ అనే నాలుగు విభాగాల్లో దివ్యాంగ క్రీడాకారుల అభివృద్ధికి కృషి చేస్తోందని ప్రతినిధులు తెలిపారు.

సీఎం గౌడ్ తిరుపతి స్టాప్ రిపోర్టర్