వాల్మీకి మహర్షి జీవితం స్ఫూర్తిదాయకం జిన్నారం తహసిల్దార్ ఆంటోనీ కార్యాలయంలో ఘనంగా వాల్మీకి మహర్షి జయంతి వేడుకలు

జిన్నారం :వాల్మీకి మహర్షి జీవితం ఆయన బోధనలు సమాజానికి స్ఫూర్తిదాయకమని జిన్నారం తహసిల్దార్ ఆంటోనీ అన్నారు. సోమవారం తాసిల్దార్ కార్యాలయంలో వాల్మీకి మహర్షి జయంతి వేడుకలను ఘనంగా నిర్వహించారు. ఈ సందర్భంగా ఆయన చిత్రపటానికి తాసిల్దార్ ఆంటోనీ పూలమాలలు వేసి సిబ్బందితో నివాళులర్పించారు. ఈ సందర్భంగా ఆయన మాట్లాడుతూ... భారతీయ సంస్కృతి సాహిత్య చరిత్రలో వాల్మీకి మహర్షికి విశిష్టమైన స్థానం ఉందన్నారు. రామాయణ మహా కావ్యాన్ని రచించి ప్రపంచానికి ధర్మం ,సత్యం , న్యాయం, మానవతా విలువలను చాటి చెప్పిన మహనీయుడు వాల్మీకి మహర్షి అని కొనియాడారు. ఆయన రచించిన రామాయణం తరతరాలకు మార్గదర్శకంగా నిలుస్తూ సమాజానికి నైతిక విలువలను బోధిస్తోందని పేర్కొన్నారు. ఈ కార్యక్రమంలో డిప్యూటీ తాసిల్దార్ కరుణాకర్, ఆర్ ఐ శ్రీనివాస్, ఆర్ ఐ యాదయ్య, కౌన్సిలర్ సతీష్, కార్యాలయ సిబ్బంది, తదితరులు పాల్గొన్నారు.