అక్రమ ఇసుక నిలువలు సీజ్

పాపన్నపేట;మండల పరిధిలోని నాగ్సాన్‌పల్లి గ్రామ పరిధిలోగల ఏడుపాయలలో అక్రమంగా నిల్వ ఉంచిన ఇసుకపై రెవెన్యూ అధికారులు చర్యలు చేపట్టారు. గ్రామంలోని మూడు ప్రాంతాల్లో అనుమతులు లేకుండా నిల్వ చేసిన 19 ట్రాక్టర్ల ఇసుకను సోమవారం సీజ్ చేసినట్లు పాపన్నపేట తహసీల్దార్ సతీష్ కుమార్ తెలిపారు.ఈ సందర్భంగా తహసీల్దార్ మాట్లాడుతూ.. మండలంలో క్షేత్రస్థాయి తనిఖీలు నిర్వహిస్తున్న క్రమంలో నాగ్సాన్‌పల్లిలో ఇసుక నిల్వలను గుర్తించినట్లు వెల్లడించారు. వాటిపై విచారణ చేపట్టగా, సంబంధిత అనుమతులు లేకుండానే ఇసుకను నిల్వ ఉంచినట్లు గుర్తించామని తెలిపారు. దీంతో నిబంధనల ప్రకారం చర్యలు తీసుకుంటూ అక్రమంగా నిల్వ చేసిన ఇసుక కుప్పలను సీజ్ చేసినట్లు పేర్కొన్నారు.ఈ తనిఖీలు మండల గిర్దావర్ శరత్, నాగ్సాన్‌పల్లి గ్రామ జీపీఓ భూమయ్య ఆధ్వర్యంలో నిర్వహించినట్లు తెలిపారు. ప్రభుత్వ నిబంధనలకు విరుద్ధంగా ఇసుక నిల్వలు ఏర్పాటు చేసినా, అనుమతులు లేకుండా ఇసుకను తరలించినా ఉపేక్షించేది లేదని స్పష్టం చేశారు.ముఖ్యంగా మంజీరా నది నుంచి ఎలాంటి అనుమతులు లేకుండా ఇసుకను తరలించే వారిపై శాఖాపరమైన చర్యలు తీసుకుంటామని తహసీల్దార్ సతీష్ కుమార్ హెచ్చరించారు. అక్రమ ఇసుక రవాణా, నిల్వలపై నిరంతరం నిఘా ఉంచుతామని, నిబంధనలు ఉల్లంఘించే వారిపై చట్ట ప్రకారం చర్యలు తీసుకుంటామని తెలిపారు.