telangana
ఎస్ఐఆర్ ప్రక్రియను పక్కాగా పూర్తి చేయాలి ... రాష్ట్ర ప్రధాన ఎన్నికల అధికారి
సూర్య కరీంనగర్ ప్రతినిధి ;;ఓటరు జాబితా ప్రత్యేక సమగ్ర సవరణ (ఎస్ఐఆర్) ప్రక్రియలో ప్రతి అంశాన్ని పారదర్శకంగా నమోదు చేయాలని, అర్హులైన ప్రతి ఒక్కరికీ ఓటు హక్కు కల్పించాలని రాష్ట్ర ప్రధాన ఎన్నికల అధికారి సి. సుదర్శన్‌ రెడ్డి అధికారులను ఆదేశించారు. సోమవారం అన్ని జిల్లాల కలెక్టర్లతో నిర్వహించిన వీడియో కాన్ఫరెన్స్‌లో ఎస్ఐఆర్ పురోగతిని సమీక్షించారు. కరీంనగర్ జిల్లా నుంచి కలెక్టర్‌, జిల్లా ఎన్నికల అధికారి చిత్ర మిశ్రా పాల్గొన్నారు. పెండింగ్‌లో ఉన్న సుమారు 4.50 లక్షల పనులను మూడు, నాలుగు రోజుల్లో పూర్తి చేయాలని, ఎస్ఐఆర్ నోటీసుల విచారణను గడువులోగా ముగించాలని సుదర్శన్‌ రెడ్డి సూచించారు. ఓటర్ల పేర్ల చేర్పులు, తొలగింపులకు సంబంధించిన ధ్రువీకరణ పత్రాలు, ఆధారాలను భౌతికంగా, ఆన్‌లైన్‌లో భద్రపరచాలని స్పష్టం చేశారు. రాష్ట్రవ్యాప్తంగా సుమారు 50 వేల దరఖాస్తులను అనర్హమైనవిగా గుర్తించగా, వాటిలో 44 వేల దరఖాస్తుల ప్రక్రియ తుది దశకు చేరినట్లు తెలిపారు. ఫారం-6, 7, 8 దరఖాస్తుల పరిశీలనతో పాటు పెండింగ్‌ పనులను నవంబర్‌ 5వ తేదీలోగా పరిష్కరించాలని ఆదేశించారు.
హుజూరాబాద్‌పై ప్రత్యేక దృష్టి....
హుజూరాబాద్‌ నియోజకవర్గంలో ఎస్ఐఆర్ ప్రక్రియలో 202 లాజికల్‌ వ్యత్యాసాలు, మ్యాపింగ్‌ లేని 243 కేసులను గుర్తించినట్లు అధికారులు తెలిపారు. ఈ నియోజకవర్గంలో అర్హత లేని ఓటర్లకు సంబంధించిన కేసులపై ప్రత్యేక శ్రద్ధ వహించాలని కలెక్టర్‌ చిత్ర మిశ్రా సూచించారు. ప్రతి కేసును ఈఆర్‌ఓ స్వయంగా పునఃపరిశీలించి, అనర్హతకు సంబంధించి స్పష్టమైన ఆధారాలతో కూడిన ఉత్తర్వులను సిద్ధం చేయాలని ఆదేశించారు. ఏడు రోజులకు పైగా పెండింగ్‌లో ఉన్న ఫారం-6 దరఖాస్తులు 2,403, ఫారం-8 దరఖాస్తులు 1,440 ఉన్నందున, వాటిని ఏఈఆర్‌ఓల వారీగా విభజించి ఆలస్యానికి గల కారణాలను సమీక్షించి త్వరగా పరిష్కరించాలని సూచించారు. ఈ వారంలో రాజకీయ పార్టీల ప్రతినిధులతో నిర్వహించనున్న సమావేశంలో స్వీకరించిన దరఖాస్తులు, వాటి రసీదుల వివరాలను అందుబాటులో ఉంచాలని అధికారులకు తెలిపారు.
