ప్రభుత్వ భూముల్లో అక్రమ నిర్మాణాలు చేపడితే కఠిన చర్యలు తప్పవు.. దేవరయాంజాల్‌లో అక్రమ నిర్మాణాల తొలగింపు
శామీర్‌పేట, మేజర్ న్యూస్ : ప్రభుత్వ భూములను ఆక్రమించి అక్రమ నిర్మాణాలు చేపడితే కఠిన చర్యలు తప్పవని శామీర్‌పేట తహసీల్దార్‌ చిల్లా శ్రీనివాస్ హెచ్చరించారు. ప్రభుత్వ భూముల పరిరక్షణలో భాగంగా అక్రమ నిర్మాణాలను ఉపేక్షించేది లేదని స్పష్టం చేశారు.తహసీల్దార్‌ ఆదేశాల మేరకు మండల రెవెన్యూ ఇన్‌స్పెక్టర్‌ భానుచందర్‌, దేవరయాంజాల్‌ గ్రామ పంచాయతీ అధికారి రమ మంగళవారం సిబ్బందితో కలిసి మల్కాజిగిరి మున్సిపల్‌ కార్పొరేషన్‌ పరిధిలోని శామీర్‌పేట డివిజన్ దేవరయాంజాల్‌ గ్రామంలో తనిఖీలు నిర్వహించారు. ఈ సందర్భంగా గ్రామంలోని సర్వే నంబర్లు 684, 685లో కొందరు వ్యక్తులు ప్రభుత్వ భూముల్లో అక్రమంగా నిర్మాణాలు చేపడుతున్నట్లు గుర్తించి, వాటిని పూర్తిగా తొలగించారు.ఈ సందర్భంగా రెవెన్యూ అధికారులు మాట్లాడుతూ ప్రభుత్వ భూముల ఆక్రమణలను అరికట్టేందుకు ప్రత్యేక చర్యలు చేపడుతున్నామని తెలిపారు. ప్రభుత్వ భూముల్లో అనుమతులు లేకుండా నిర్మాణాలు చేపట్టడం, భూములను ఆక్రమించడం వంటి చర్యలకు పాల్పడితే చట్టప్రకారం కఠిన చర్యలు తీసుకుంటామని హెచ్చరించారు. ప్రభుత్వ భూములను పరిరక్షించడమే లక్ష్యంగా ఆక్రమణలపై నిరంతరం నిఘా కొనసాగిస్తామని స్పష్టం చేశారు.
రిపోర్టర్: తాటికొండ రవి గౌడ్, ఉమ్మడి షామీర్పేట్, మేడ్చల్ జిల్లా.
