అపరిచితుల పట్ల విద్యార్థులు అప్రమత్తంగా ఉండాలి

సూర్య-గోదావరిఖని:విద్యార్థులు అపరిచితుల పట్ల నిత్యం అప్రమత్తంగా ఉండాలని గోదావరిఖని మొదటి అదనపు మున్సిఫ్ మేజిస్ట్రేట్ రామగిరి స్వారిక సూచించారు. సుప్రీంకోర్టు, రాష్ట్ర న్యాయసేవాధికార సంస్థల పిలుపు మేరకు ‘సురక్షిత్‌–బచపన్‌ అభియాన్‌’ కార్యక్రమంలో భాగంగా సోమవారం మార్కండేయ కాలనీలోని నారాయణ విద్యాసంస్థలో నిర్వహించిన పోక్సో చట్ట అవగాహన కార్యక్రమానికి ఆమె ముఖ్య అతిథిగా హాజరై మాట్లాడారు. ఇంట్లోనైనా, బయటైనా మనుషుల రూపంలో ఉన్న దుర్మార్గుల పట్ల జాగ్రత్తగా ఉండాలని సూచించారు. గుడ్ టచ్‌, బ్యాడ్ టచ్‌పై ప్రతి విద్యార్థి అవగాహన కలిగి ఉండాలని, తమకు అసౌకర్యం కలిగించే ప్రవర్తనను గుర్తించి వెంటనే తల్లిదండ్రులు, ఉపాధ్యాయులకు తెలియజేయాలని చెప్పారు. విద్యాసంస్థల్లో, బయట బాలికల పట్ల అసభ్యంగా ప్రవర్తించే వారిపై అప్రమత్తంగా ఉండాలని సూచించారు. మొబైల్ ఫోన్లు, సోషల్ మీడియా రీల్స్‌కు అనవసరంగా అలవాటు పడకుండా, వాటిని జాగ్రత్తగా వినియోగించాలని అన్నారు. పిల్లల భద్రతకు సంబంధించిన సమస్యలు ఎదురైనప్పుడు భయపడకుండా పెద్దల సహాయం తీసుకోవాలని, అత్యవసర పరిస్థితుల్లో డయల్‌ 100 సేవలను వినియోగించుకోవాలని సూచించారు. ఇంకా ఈ కార్యక్రమంలో పాఠశాల ప్రిన్సిపాల్ రజిత, బార్ అసోసియేషన్ అధ్యక్షుడు బల్మూరి అమరేందర్ రావు, న్యాయవాదులు చందాల శైలజ, ఎండీ.ఉమర్, రాజ్యలక్ష్మి, వన్‌టౌన్ మహిళా ఎస్‌ఐ కె.అనూష, కోర్టు సూపరింటెండెంట్ అసరి శ్రీనివాస్ తదితరులు పాల్గొన్నారు.