సీతారాంపల్లిలో దొంగల బీభత్సం..

సిద్దిపేట రూరల్,మేజర్ న్యూస్: రూరల్ మండలం సీతారాంపల్లి గ్రామంలో దొంగలు హల్‌చల్‌ చేశారు. తాళాలు వేసి ఉన్న నాలుగు ఇళ్లను లక్ష్యంగా చేసుకుని చోరీలకు పాల్పడ్డారు. బంగారం, వెండి ఆభరణాలను అపహరించుకెళ్లారు.రూరల్ ఎస్సై డి. నవత తెలిపిన వివరాల ప్రకారం.. గ్రామానికి చెందిన పోచంపల్లి స్వామి తన భార్య ప్రత్యూషతో కలిసి కుటుంబ అవసరాల నిమిత్తం మహారాష్ట్రలోని లిక్కర్ డిపో వద్దకు వెళ్లారు. ఇదే అదనుగా భావించిన దొంగలు వారి ఇంటి తాళాలు పగులగొట్టి లోపలికి ప్రవేశించారు. బీరువాను పగులగొట్టి ఒక తులం బంగారు గొలుసు, ఏడు గ్రాముల బరువున్న చిన్న బంగారు ఉంగరాలు, పది తులాల వెండి కడియాలను ఎత్తుకెళ్లారు.
అదేవిధంగా గ్రామానికి చెందిన జీర్కపల్లి లింగం, జీర్కపల్లి మల్లయ్య ఇళ్లలోనూ తాళాలు పగులగొట్టి చోరీకి యత్నించారు. అక్కడ ఎలాంటి వస్తువులు లభించకపోవడంతో వెనుదిరిగారు. బాధితురాలు ప్రత్యూష ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై నవత తెలిపారు.

(సూర్య రూరల్, రమేష్)