డ్రాయింగ్ పోటీల్లో శ్రీ శారద విద్యానికేతన్ విద్యార్థిని ప్రతిభ

పాములపాడు, మేజర్ న్యూస్: పాములపాడు మండల కేంద్రంలోని శ్రీ శారద విద్యానికేతన్ పాఠశాలకు చెందిన పదో తరగతి విద్యార్థిని ఎస్. షాజహాన్ డ్రాయింగ్ పోటీల్లో ప్రతిభ కనబరిచి ప్రశంసాపత్రం అందుకుంది. ఈ విషయాన్ని పాఠశాల కరస్పాండెంట్ శ్రీనివాసులు తెలిపారు.

సెప్టెంబర్ 28న ప్రపంచ అంతరిక్ష వారోత్సవాల సందర్భంగా అంతరిక్ష విజ్ఞానంపై నిర్వహించిన డ్రాయింగ్ పోటీల్లో షాజహాన్ ప్రతిభ చాటినట్లు ఆయన పేర్కొన్నారు. ఈ సందర్భంగా ఎంఈఓ బాలాజీ నాయక్ చేతుల మీదుగా విద్యార్థినికి ప్రశంసాపత్రాన్ని అందజేశారు. శ్రీహరికోట స్పేస్ సెంటర్, విప్రో సంస్థ జారీ చేసిన ప్రశంసాపత్రాలతో పాటు ఆమె గీసిన చిత్రపటాన్ని కూడా అందించినట్లు తెలిపారు.

విద్యార్థుల్లో బాల్యం నుంచే అంతరిక్ష విజ్ఞానం, సైన్స్, సాంకేతిక రంగాలపై ఆసక్తిని పెంపొందించాలని ఈ సందర్భంగా సూచించారు. భవిష్యత్తులో ఆధునిక సాంకేతిక పరిజ్ఞానాన్ని సమర్థవంతంగా వినియోగించుకునేలా విద్యార్థులను ప్రోత్సహించాలని పేర్కొన్నారు.

డ్రాయింగ్ పోటీల్లో ప్రతిభ కనబరిచిన విద్యార్థిని ఎస్. షాజహాన్‌ను పాఠశాల కరస్పాండెంట్ శ్రీనివాసులు అభినందించారు.