జిన్నారం డి.ఎస్.పి కార్యాలయం కోసం కదం తొక్కిన బిజెపి నాయకులు

 జిన్నారం:జిన్నారం మున్సిపల్ కేంద్రంలో డీఎస్పీ కార్యాలయాన్ని ఏర్పాటు చేసి, అక్కడి నుంచే పరిపాలన సాగించాలని ప్రభుత్వం ఉత్తర్వులు జారీ చేసిన నేపథ్యంలో, కార్యాలయాన్ని ఇతర ప్రాంతానికి తరలించే ప్రయత్నాలను నిరసిస్తూ బీజేపీ నాయకులు, కార్యకర్తలు సోమవారం మున్సిపల్ బిజెపి శాఖ అధ్యక్షుడు జగన్ రెడ్డి ఆధ్వర్యంలో అంబేద్కర్ ప్రధాన చౌరస్తా లో భారీ ర్యాలీ నిర్వహించారు. నిరసన ర్యాలీతో జిన్నారం దద్దరిల్లిపోయింది. అనంతరం తాసిల్దార్ అంటోనీకి బిజెపి నాయకులు ,కార్యకర్తలు వినతి పత్రాన్ని అందజేశారు. మున్సిపల్ కేంద్రంలోనే డీఎస్పీ కార్యాలయాన్ని నిర్మించి, ఇక్కడి నుంచే పోలీసు పరిపాలన కొనసాగించాలని వారు పెద్ద ఎత్తున నినాదాలు చేస్తూ డిమాండ్ చేశారు. ఈ సందర్భంగా జగన్ రెడ్డి మాట్లాడుతూ... ప్రభుత్వం జిన్నారం కేంద్రంగా డీఎస్పీ కార్యాలయం ఏర్పాటుకు నిర్ణయం తీసుకున్నప్పటికీ, కొందరు నాయకులు, అధికారులు కార్యాలయాన్ని మరో ప్రాంతంలో ఏర్పాటు చేసేందుకు ప్రయత్నిస్తున్నారని ఆరోపించారు. జిన్నారం పేరుతో ఇతర ప్రాంతంలో కార్యాలయం ఏర్పాటు చేయడం సరికాదని పేర్కొన్నారు. ప్రభుత్వ ఉత్తర్వుల మేరకు జిన్నారంలోనే డీఎస్పీ కార్యాలయాన్ని నిర్మించి, స్థానిక ప్రజలకు పోలీసు సేవలు అందుబాటులో ఉండేలా చర్యలు తీసుకోవాలని కోరారు. ఈ నిరసన ర్యాలీలో మున్సిపల్ వైస్ చైర్మన్ ప్రతాపరెడ్డి, ఉమ్మడి మండలానికి చెందిన బీజేపీ కౌన్సిలర్లు, నాయకులు నర్సింగరావు, అశోక్ కుమార్, రాజిరెడ్డి, సుధాకర్, పల్నాటి శ్రీనివాస్‌తో పాటు పలువురు పార్టీ కార్యకర్తలు పాల్గొన్నారు.