మహిళా హత్య కేసును చేదించిన జిన్నారం పోలీసులు

 జిన్నారం:మహిళ దారుణ హత్య కేసును జిన్నారం పోలీసులు ఛేదించారు. భార్యపై అనుమానం పెంచుకొని ఆమెను హత్య చేసిన భర్త హుస్సేన్‌ (43)ను అరెస్టు చేసి రిమాండ్‌కు తరలించారు. కేసు వివరాలను జిన్నారం ఎస్‌హెచ్‌ఓ నాగార్జున గౌడ్‌ వెల్లడించారు. పోలీసులు తెలిపిన వివరాల ప్రకారం.. మెదక్ జిల్లా రాలమడుగు గ్రామానికి చెందిన హుస్సేన్ (43) జీవనోపాధి కోసం చర్చి గాగిలాపూర్‌లో తన భార్య అఫ్రీన్‌ బేగం(34), ఇద్దరు పిల్లలు ఆలియా, బిలాల్‌తో కలిసి నివాసం ఉంటున్నాడు. హుస్సేన్ డ్రైవర్ గా పనిచేస్తుండగా, అఫ్రీన్‌ బేగం కూలి పనులకు వెళ్తుండేది.ఈ క్రమంలో పని చేసే చోట ఇతరులతో భార్య చనువుగా ఉంటోందని హుస్సేన్‌ అనుమానం పెంచుకున్నాడు.దీంతో దంపతుల మధ్య తరచూ గొడవలు జరిగేవి. దసరా పండుగకు ముందు రోజు కూడా భార్యాభర్తల మధ్య గొడవ జరిగింది. అనంతరం భార్యను బయటకు తీసుకెళ్తానని నమ్మించిన హుస్సేన్‌.. ఆమెను వావిలాల గ్రామ శివారులోని అటవీ ప్రాంతానికి తీసుకెళ్లాడు. అక్కడే ఆమెతో శారీరకంగా కలిసి గొంతు నిలిమి చంపేశాడు. అనంతరం మెదక్‌కు వెళ్లిన నిందితుడు.. భార్య కనిపించడం లేదంటూ ఆమె ఫోన్‌ను బస్టాండ్‌ సమీపంలో పడేసి, పోలీస్‌స్టేషన్‌లో మిస్సింగ్‌ కేసు నమోదు చేయించాడు.ఆ తర్వాత తిరిగి హత్య చేసిన ప్రాంతానికి వెళ్లి, ఆమె మరణించిందో లేదోనన్న అనుమానంతో మరోసారి కత్తితో గొంతుపై దాడి చేసినట్లు పోలీసుల దర్యాప్తులో తేలింది. కేసును అన్ని కోణాల్లో దర్యాప్తు చేసిన జిన్నారం పోలీసులు నిందితుడిని గుర్తించి అరెస్టు చేశారు. అనంతరం కోర్టులో హాజరుపరిచి రిమాండ్‌కు తరలించినట్లు పోలీసులు వెల్లడించారు.