బస్సు నుంచి జారిపడి నర్సింగ్ విద్యార్థినికి గాయాలు

కోటబొమ్మాళి, అక్టోబరు 26, మేజర్ న్యూస్:
ఓ వైపు అధిక రద్దీ, మరోవైపు డ్రైవర్ అజాగ్రత్త ఒక విద్యార్థిని ప్రాణాల మీదకు తెచ్చిపెట్టింది. రద్దీగా ఉన్న ప్రైవేటు బస్సు నుంచి జారిపడి నర్సింగ్ విద్యార్థిని గాయపడిన ఘటన  మండలంలోని కొత్తపేటలో సోమవారం ఉదయం చోటుచేసుకుంది. ​స్థానికులు తెలిపిన వివరాల ప్రకారం... సంతబొమ్మాళి మండలం శివరాంపురం గ్రామానికి చెందిన ఐ.లలిత అనే విద్యార్థిని శ్రీకాకుళంలోని రాగోలు ‘జేమ్స్’ వైద్యకళాశాలలో నర్సింగ్ చదువుతోంది. దసరా సెలవుల నిమిత్తం సొంతూరు వచ్చిన లలిత, సెలవులు ముగియడంతో తిరిగి కళాశాలకు వెళ్లేందుకు సోమవారం ఉదయం ప్రయాణమైంది. ​సాకిపల్లి కొత్తూరు జంక్షన్ వద్ద ప్రయాణికులతో కిక్కిరిసి ఉన్న ఓ ప్రైవేటు బస్సు ఎక్కింది. బస్సులో తీవ్ర రద్దీ ఉండటంతో ఆమె తలుపు వద్ద నిలబడాల్సి వచ్చింది.
​బస్సు కోటబొమ్మాళి మండలం జాతీయ రహదారిపై ఉన్న కొత్తపేట బి.ఎన్.ఎమ్ పెట్రోల్ బంకు సమీపానికి చేరుకునేసరికి, డ్రైవర్ ఒక్కసారిగా జాతీయ రహదారి నుంచి సర్వీస్ రోడ్డు వైపు వేగంగా బస్సును తిప్పడంతో, తలుపు వద్దే నిలబడి ఉన్న లలిత పట్టుతప్పి బస్సులోంచి బయటకు కిందకు పడిపోవడంతో ఆమెకు గాయాలయ్యాయి.
​ప్రమాదాన్ని గమనించిన స్థానికులు తక్షణమే స్పందించి గాయపడిన లలితను కోటబొమ్మాళి స్థానిక ప్రభుత్వ ఆసుపత్రికి తరలించారు. అనంతరం మెరుగైన వైద్య చికిత్స కోసం కుటుంబసభ్యులు ఆమెను శ్రీకాకుళంలోని ఒక ప్రైవేటు ఆసుపత్రికి తరలించారు. ​ఈ ప్రమాదంపై సమాచారం అందుకున్న కోటబొమ్మాళి ఎస్ఐ వి సత్యనారాయణ సంఘటనా స్థలానికి చేరుకుని వివరాలు సేకరించారు. బాధితురాలి బంధువుల ఫిర్యాదు మేరకు కేసు నమోదు చేసి, ఘటనపై దర్యాప్తు జరుపుతున్నట్లు ఎస్ఐ తెలిపారు.
​ప్రజా రవాణా మరియు ప్రైవేటు బస్సుల్లో పరిమితికి మించి ప్రయాణికులను ఎక్కించుకోవడం, డ్రైవర్ల నిర్లక్ష్యంపై స్థానిక ప్రజలు తీవ్ర ఆగ్రహం వ్యక్తం చేస్తున్నారు.