ఎన్నికల వ్యయ పర్యవేక్షణలో నిర్లక్ష్యానికి తావులేకుండా విధులు నిర్వహించాలి

నందిగామ‌, మేజర్ న్యూస్ : స్థానిక సంస్థల ఎన్నికలు స్వేచ్ఛగా, నిష్పక్షపాతంగా, పారదర్శకంగా జరిగేలా ఎన్నికల వ్యయ పర్యవేక్షణ బృందాలు సమన్వయంతో, అప్రమత్తంగా విధులు నిర్వహించాలని ఎన్టీఆర్ జిల్లా ఎన్నికల వ్యయ పరిశీలకులు బి.విజయ్ కుమార్ సూచించారు. ఆయ‌న మంగ‌ళ‌వారం జగ్గయ్యపేట, నందిగామ పట్టణ స్థానిక సంస్థల పరిధిలో విధులు నిర్వహిస్తున్న ఫ్లయింగ్ స్క్వాడ్, స్టాటిక్ సర్వైలెన్స్ బృందాలను క్షేత్రస్థాయిలో తనిఖీ చేసి, వాటి పనితీరును పరిశీలించారు. ఎన్నికల్లో ధన ప్రభావాన్ని అరికట్టేందుకు నగదు, మద్యం, కానుకలు తదితర ప్రలోభాలకు సంబంధించిన వస్తువుల అక్రమ రవాణాపై నిఘా పెంచాలని, తనిఖీలను పకడ్బందీగా నిర్వహించాలని ఆదేశించారు. చేపట్టిన తనిఖీల వివరాలను నిర్ణీత రిజిస్టర్లలో ఎప్పటికప్పుడు నమోదు చేయాలని సూచించారు. అనంతరం నందిగామ, జగ్గయ్యపేట పట్టణ స్థానిక సంస్థల సహాయ ఎన్నికల వ్యయ పరిశీలకులతో సమీక్ష నిర్వహించారు. పోటీలో ఉన్న అభ్యర్థులందరి ఎన్నికల వ్యయ వివరాలను రాష్ట్ర ఎన్నికల సంఘం (ఏపీఎస్ఈసీ) మార్గదర్శకాలకు అనుగుణంగా క్షుణ్ణంగా పరిశీలించాలని స్పష్టం చేశారు. వ్యయ వివరాలను నిర్ణీత నమూనాల్లో, నిర్దేశించిన గడువులోగా నమోదు చేయడంతో పాటు, నిబంధనల ఉల్లంఘనలు గుర్తించిన పక్షంలో తక్షణమే సంబంధిత అధికారుల దృష్టికి తీసుకెళ్లి తగిన చర్యలు చేపట్టాలని సూచించారు. ఎన్నిక‌లు స్వేచ్ఛ‌గా, నిష్ప‌క్ష‌పాతంగా, పార‌ద‌ర్శ‌కంగా జ‌రిగేలా చూడ‌టంలో ఎన్నిక‌ల వ్య‌య ప‌ర్య‌వేక్ష‌ణ అత్యంత కీల‌క‌మ‌ని.. ఆ బాధ్య‌త‌ను అన్ని బృందాలు స‌మ‌న్వ‌యంతో నిబ‌ద్ధ‌త‌తో నిర్వ‌ర్తించాల‌ని ప‌రిశీల‌కులు పేర్కొన్నారు.

స్టాఫ్ రిపోర్టర్: ✍️ ప్రేమ్ రాజ్, జగ్గయ్యపేట, నందిగామ నియోజకవర్గాలు, ఎన్టీఆర్ జిల్లా.