కొత్తపేటలో పోలీసుల కార్డెన్ సెర్చ్

- సరైన పత్రాలు లేని 11 ద్విచక్రవాహనాలు సీజ్ కోటబొమ్మాళి, అక్టోబరు 26, మేజర్ న్యూస్: రాబోయే స్థానిక సంస్థల ఎన్నికల నేపథ్యంలో ఎలాంటి అవాంఛనీయ సంఘటనలు జరగకుండా, శాంతిభద్రత పరిరక్షణ మరియు నేరాల నియంత్రణే ధ్యేయంగా మండలంలో గల కొత్తపేట తారకరామ కాలనీలో సోమవారం స్థానిక ఎస్ఐ వంగపండు సత్యన్నారాయణ తన సిబ్బందిలో కలిసి కార్డెన్ సెర్చ్ ఆపరేషన్ నిర్వహించారు. దీనిలో భాగంగా సరైన ధ్రువీకరణ పత్రాలు (ఆర్సీ, లైసెన్స్ మొదలైనవి) లేని 11 ద్విచక్ర వాహనాలను మరియు అనుమానాస్పద వాహనాలను పోలీసులు స్వాధీనం చేసుకుని పోలీస్ స్టేషన్‌కు తరలించారు. అలాగే పాత నేరస్థులు, రౌడీషీటర్లు మరియు అనుమానాస్పదంగా కనిపిస్తున్న కొత్త వ్యక్తుల వివరాలను పోలీసులు క్షుణ్ణంగా ఆరా తీశారు. ​ఈ సందర్భంగా ఎస్ఐ వి. సత్యనారాయణ మాట్లాడుతూ ఇళ్లను అద్దెకు ఇచ్చే ముందు వారి పూర్తి పూర్వాపరాలు తెలుసుకోవాలని, అపరిచిత లేదా అనుమానాస్పద వ్యక్తులు కనిపిస్తే వెంటనే స్థానిక పోలీసులకు సమాచారం అందించాలని సూచించారు. ఎన్నికల వేళ ఉచితాలు, చట్టవిరుద్ధంగా మద్యం సీసాలు నిల్వ చేయడం లేదా పెద్ద మొత్తంలో రికార్డులు లేని నగదు రవాణా చేస్తే చట్టపరమైన చర్యలు ఉంటాయని హెచ్చరించారు. ఎన్నికల నిబంధనలు (కోడ్) ప్రతీ ఒక్కరూ పాటించాలని, శాంతియుత వాతావరణానికి సహకరించాలని కోరారు.​ఈ తనిఖీలో స్థానిక పోలీస్ సిబ్బంది, ఇతర ఉన్నతాధికారులు పాల్గొన్నారు.